Tags-Saqi

jo nazar uThtī hai ban jaatī hai ik mauj-e-ḳhumār
dast-e-sāqī meñ koī jaam chhalaktā hogā

zāhid ne kuchh is andāz se pī saaqī kī nigāheñ paḌne lagīñ
mai-kash yahī ab tak samjhe the shā.ista daur-e-jām nahīñ

sarshār huuñ saaqī kī āñkhoñ ke tasavvur se
hai koī ġharaz mujh ko baada se na sāġhar se

shīsha o saaqī o sāġhar bhī hāzir haiñ 'nazīr'
mai-kashī kījiye ab der hai kyā bismillāh

aaj pī kar bhī vahī tishna-labī hai saaqī
lutf meñ tere kahīñ koī kamī hai saaqī

ḳharābāt-e-jahāñ meñ kaun hai dil-soz saaqī sā
agar tarchhaT bhī denā hai to tujh ko chhān kar degā

mai-kade kā raaz parde hī meñ rahnā ḳhuub thā
dekh saaqī shīsha kuchh kahtā hai thak kar jaam se

ishtiyāq-e-mai-kashī kuchh mai-kashī se kam nahīñ
ham to saaqī mast ho jaate haiñ ḳhālī jaam se

aur to matlab nahīñ kuchh ham ko daur-e-jām se
haañ evaz letā hai saaqī gardish-e-ayyām se

ham faqīr-e-mai-kada saaqī hameñ kyā chāhiye
hai vahī kaafī chhalak jaatī hai jitnī jaam se

ye dushmanī hai saaqī yā dostī hai saaqī
auroñ ko jaam denā mujh ko dikhā dikhā ke

hai lab-e-sāqī meñ chashma ḳhizr kā
gar tujhe āb-e-baqā darkār hai

pī lo do ghūñT ki saaqī kī rahe baat 'hafīz'
saaf inkār se ḳhātir-shikanī hotī hai

yaqīñ hai sub.h-e-qayāmat ko bhī subuhuhī-kash
uTheñge ḳhvāb se saaqī subū subū karte

tezī-e-bāda kujā talḳhī-e-guftār kujā
kund hai nashtar-e-sāqī se sinān-e-vā.iz

is tarah pand-o-nasīhat kī uThā.ī tamhīd
aaj saaqī pe huā mujh ko gumān-e-vā.iz

paañv paḌ kar lā.eñge āñkheñ dikhā kar lā.eñge
dekh lenā aaj ham saaqī se sāġhar lā.eñge

chashm-e-sāqī kā vasf likhtā huuñ
le qalam haat shāḳh-e-nargis kā

na sāz-o-mutrib na jām-o-sāqī na vo bahār-e-chaman hai baaqī
nigāh-e-sham-e-sahar ke parde ye naqsha-e-anjuman hai baaqī

saaqī bhale phaTakne na de paas jaam ke
niyyat to bāñdh sakte haiñ pīchhe imaam ke