Tags-Ritual

yaad kar ke tujhe mazlūm-e-vatan ro.eñge
banda-e-rasm-e-jafā chain se ab so.eñge

ābād ham āshufta-saroñ se nahīñ maqtal
ye rasm abhī shahr meñ zinda hai ki tum ho

ye rasm barham fanā hai ai dil gunāh hai jumbish nazar bhī
rahegī kyā aabrū hamārī jo tū yahāñ be-qarār hogā

kareñge amn kī bāteñ diloñ meñ buġhz rakkheñge
yahī rasm-e-jahāñ aur fitrat-e-aqvām hai saaqī

kab se paḌī haiñ dil meñ tere zikr kī saarī rāheñ band
barsoñ guzre is bastī meñ rasm-e-salām-o-payām nahīñ

ga.ī hai kaisī zamāne se rasm-e-sar-garmī
ajab nahīñ hai jo patthar meñ bhī sharār na ho

zamīn pe qābīl ke qabīle kī rasm-e-be-dād auj par hai
magar hamārā azaab is se bhī talḳh-tar hai

hameñ yaad ho to sunā.eñ bhī zarā dhyān ho to batā.eñ bhī
ki vo dil jo mahram-e-rāz thā kahāñ rasm-o-rāh meñ jal-bujhā

dil rasm-o-rah-e-shauq se mānūs to ho le
takmīl-e-tamannā ke liye umr paḌī hai

ab ehtiyāt kī koī sūrat nahīñ rahī
qātil se rasm-o-rāh sivā kar chuke haiñ ham

in dinoñ rasm-o-rah-e-shahr-e-nigārāñ kyā hai
qāsidā qīmat-e-gul-gasht-e-bahārāñ kyā hai

hañsne meñ bhī nihāñ haiñ yahāñ nāla-hā-e-dard
pāmāl rasm-e-ijz mirī bandagī nahīñ

ye qā.eda rasm-o-rāh kā hai ḳhayāl donoñ taraf ho yaksāñ
kisī ko parvā na hogī jis dam kisī kī parvā na kījiyegā

falak ne un ko atā kī hai ḳhvājgī ki jinheñ
ḳhabar nahīñ ravish-e-banda-parvarī kyā hai

vasl kī shab bhī adā-e-rasm-e-hirmāñ meñ rahā
sub.h tak maiñ iltimās-e-shauq-e-pinhāñ meñ rahā

itnā bhī mire ahd-e-vafā par na karo shak
haañ haañ maiñ samajhtā huuñ ki hai rasm-e-jahāñ aur

ik rasm-e-bevafā.ī thī vo bhī huī tamām
vo yār-e-bevafā mujhe kitnā aziiz thā

rasm-e-ādāb-o-mohabbat kā vo pāband kahāñ
jis kī taqdīr meñ ho nazr-e-vafā ho jaanā

na vo rasm-e-pardagī-e-vafā na chhupā chhupā sā payām hai
na shamīm-o-gul se kalām hai na sabā kī nāma-barī rahī

ik anokhī rasm ko zinda rakhā hai
ḳhuun hī ne ḳhuun ko paspā rakhā hai