Tags-Rekhta

āñkheñ na churā 'mus.hafī'-e-reḳhta-go se
ik umr se terā hai sanā-ḳhvān idhar dekh

diyā maiñ paan use ik reḳhta paḌh kar lagā kahne
ye iiñTī khuuī kā katthā hai aur kañkar kā chūnā hai

'mīr' kis ko ab dimāġh-e-guftugū
umr guzrī reḳhta chhūTā gayā

jaatā hai ḳhāk-e-pāk-e-deccan ko ye reḳhta
vaañ qadr-dān is guhar-e-be-bahā ke haiñ

tarz-e-be-dil meñ reḳhta kahnā
asad allāh ḳhaañ qayāmat hai

ik baat kaheñge 'inshā'-jī tumheñ reḳhta kahte umr huī
tum ek jahāñ kā ilm paḌhe koī 'mīr' sā sher kahā tum ne

reḳhta rashk-e-fārsī us se na ho sakā bayāñ
mahfil-e-urs-e-'mīr' meñ sher mire sunā ki yuuñ

huuñ maiñ to vahī mo.atakif-e-gosha-e-uzlat
hālāñki mirā reḳhta pahuñchā hai deccan meñ

jā paḌe chup ho ke jab shahr-e-ḳhamoshāñ meñ 'nazīr'
ye ġhazal ye reḳhta ye sher-ḳhvānī phir kahāñ

vo shakkarīñ-lab ne gosh-e-dil señ tamām sun kar yuuñ reḳhta kuuñ
kahā vo mīThe bachan señ mujh kuuñ 'sirāj' shīrīñ kalām dastā

ai 'mus.hafī' ustād-e-fan-e-reḳhta-goī
tujh sā koī aalam ko maiñ chhānā nahīñ miltā

yaañ faqat reḳhta hī kahne na aa.e the ham
chaar din ye bhī tamāshā sā dikhāyā ham ne

bahut thī dhuum jashn-e-reḳhta meñ
tumhāre naam kī tum ne sunā na.iiñ

jo ye kahe ki reḳhta kyūñke ho rashk-e-fārsī
gufta-e-'ġhālib' ek baar paḌh ke use sunā ki yuuñ

sarsabz mulk-e-hind meñ aisā huā ki 'mīr'
ye reḳhta likhā huā terā dakan gayā

reḳhta jis kā baḌā naam hai kyā arz karūñ
ye hamāre liye in.aam hai kyā arz karūñ

reḳhta kā ik nayā majzūb hai 'shahpar' rasūl
shohrat us ke naam par ik nañg hai bohtān hai

tab.a kah aur ġhazal, hai ye 'nazīrī' kā javāb
reḳhta ye jo paḌhā qābil-e-iz.hār na thā

muue ne muñh kī khaa.ī phir bhī ye zor zorī
ye reḳhtī hai bhaa.ī tum reḳhta to jaano

shāhid-e-bazm-e-suḳhan nāzūra-e-ma.anī-tarāz
ai ḳhudā-e-reḳhta paiġhambar-e-soz-o-gudāz