Tags-Raat

ye Dhaltī raat ye kamre meñ gūñjtā sahrā
umaDtā ḳhauf hai dil meñ ki pech-o-tāb meñ saañp

ālam-e-mastī meñ mere muñh se kuchh niklā jo raat
bol uThā tevarī chaḌhā kar vo but-e-mai-ḳhvār chup

ik raat bhī hañsā nahīñ us sham.a-rū se maiñ
aañsū mire gale ke hue haar be-sabab

ḳhvāb-nagar ke shahzāde ne aise bhī nirvān liyā
chāñd sajāyā āñkhoñ meñ aur raat ko sar par taan liyā

kaT ga.ī raat magar
hijr ke jāgte pairāhan se

navāh-e-jism meñ rotā-karāhtā din-rāt
mujhe Darātā hai koī mirī ajal kī tarah

hijr ke din kī raat huī barsāt huī
aañkh se dil kī baat huī barsāt huī

dhuup masāfat kaaTī ham ne hañs hañs kar
manzil par jab raat huī barsāt huī

raat chaltī rahtī hai aur jaltā rahtā hai charāġh
ek bujhtā hai to phir naqsh-e-digar ḳhvāboñ kā hai

raat kā dariyā aur us meñ ek tūfān-e-muhīb
jāgnā hai der tak ye bhī asar ḳhvāboñ kā hai

malbūs pahne raat apnā zar-nigār
zer-e-jāma taaz meñ laTkā huā

apnī āñkheñ hī maiñ bhuul aayā kahīñ
raat itnī bhiiḌ thī bāzār meñ

zulmat-e-ġham se itne hirāsāñ na ho kaun mushkil hai yaaro jo āsāñ na ho
ye garāñ-ḳhvāb lamhe bhī kaT jā.eñge raat Dhal jā.egī din nikal aa.egā

jam.a the raat mire ghar tire Thukrā.e hue
ek dargāh pe sab rāñda-e-dargāh mile

raat ko jiit to paatā nahīñ lekin ye charāġh
kam se kam raat kā nuqsān bahut kartā hai

kal raat tere va.ade kā bhī khul gayā bharam
zaḳhmoñ ko hañste dekh ke maiñ muskurā diyā

sūraj ke sāmne haiñ na.e din ke marhale
ab raat jā chukī hai guzishta paḌāv par

jo ḳhvāb dekhnā ta.abīr khojnā ho kabhī
to pahle raat ke lipTe hue bhañvar kholeñ

aaj kā din bhī yūñhī biit gayā shaam huī
aur ik raat kā kaTnā bhī gavārā kar leñ

vahāñ jab raat hotī hai
mire andhe mashāmoñ se