Tags-Raat

yūñhī azal se hai 'amjad' zamīn gardish meñ
kabhī sahar to kabhī raat Dhaltī rahtī hai

gahrī raat hai aur tūfān kā shor bahut
ghar ke dar-o-dīvār bhī haiñ kamzor bahut

mujh se bichhaḌ kar hogā samundar bhī bechain
raat Dhale to kartā hogā shor bahut

sab ke so jaane pe aflāk se kyā kahtā hai
raat ko ek parinde kī sadā suntā huuñ

safar irāda kar to liyā par rastoñ meñ
raat koī tūfānī bhī ho saktī hai

raat Dhaltī hai sub.h hotī hai
khol do ab to uTh ke darvāza

tanhā.ī ham-kanār hai sahrā kī rāt-bhar
kaise maiñ apne chāñd sitāre se kaT gayā

har roz qalam sar ko kiyā haath se apne
har raat ko jazbāt kī suulī pe chaḌhā huuñ

kaise mil jaatī hai āvāz-e-azāñ se har sub.h
raat bhar gūñjne vaalī jo sadā hai mujh meñ

hijr meñ din to kisī taur guzar jaate haiñ
jalne lagtī hai kabhī raat to dukh hotā hai

roz ke dukh se chhaTā raat ke jalne se rahā
dostī sham.a ne kī dosto parvāne se

mujh ko mallāhoñ ke gītoñ se mohabbat hai magar
raat sāhil par havā kā shor be-andāza thā

tārīkī ke raat azaab hī kyā kam the
din niklā to sūraj bhī saffāk huā

gardish hai tirī nargis-e-bīmār ko din-rāt
dekhī nahīñ aisī kisī bīmār kī raftār

aur us ne DhūñD liyā koī sā.ebān nayā
tamām raat maiñ hī bhīgtā rahā ab ke

jī kā janjāl hai ishq miyāñ qissa ye tamām karo 'vālī'
baḌī raat ga.ī ab so jaao kuchh der ārām karo 'vālī'

raat kā naam saverā hī sahī
aap kahte haiñ to aisā hī sahī

kyā tujh ko patā kyā tujh ko ḳhabar din raat ḳhayāloñ meñ apne
ai kākul-e-gītī ham tujh ko jis tarah sañvārā karte haiñ

ai bād-e-sahar na chheḌ ham ko
ham jaage hue haiñ rāt-bhar ke

aaj kī raat bhī guzrī hai mirī kal kī tarah
haath aa.e na sitāre tire āñchal kī tarah