Tags-Qatil

yaaro kisī qātil se kabhī pyaar na māñgo
apne hī gale ke liye talvār na māñgo

kaun pursāñ hai hāl-e-bismil kā
ḳhalq muñh dekhtī hai qātil kā

ye sach hai yā ġhalat ham ne sunā hai marne vāloñ se
tire ḳhanjar meñ qātil chashma-e-haivāñ kā paanī hai

jo vaar bhī kartā hai vo kaarī nahīñ hotā
qātil kā mire zo.am-e-hunar TuuT rahā hai

teġh hī kyā haath meñ qātil ke thī
ai hinā tū bhī to saanī jā.egī

har zulm huā bātil
aur sahm ga.e qātil

guzar ke jā.eñge jis pul-sirāt se ik din
chalo usī ḳhat-e-qātil ko rahguzār kareñ

jam gayā ḳhuuñ kaf-e-qātil pe tirā 'mīr' zi-bas
un ne ro ro diyā kal haath ko dhote dhote

maiñ tere paañv paḌūñ haath rok le qātil
use na maar jo terī taraf humaktā hai

koī gayā na ḳhauf se qātil ke sāmne
maiñ hī thā us ke rū-ba-rū jo be-dhaḌak gayā

dāman mire qātil kā na rañgīñ ho lahū se
har-chand ki nazdīk ho rag-ha-e-gulū se

jumbish-a-abrū-e-qātil kabhī aisī to na thī
bulbul-e-jāñ mirī bismil kabhī aisī to na thī

ho ke bismil ārzū-e-guftagū qātil se hai
har dahān-e-zaḳhm naqsha hai lab-e-taqrīr kā

saḳht-jānī se dil-e-muztar jo taḌpā vaqt-e-qatl
ban gayā sañg-e-fasāñ qātil tirī shamshīr kā

qātil idhar jarrāh udhar maiñ nīm-bismil ḳhaak par
ik tīr-e-kash ik tīr-e-zan ek is taraf ek us taraf

pesh-e-ḳhudā roz-e-jazā maiñ bhī huuñ chup qātil bhī chup
goyā khaḌe haiñ be-dahan ek is taraf ek us taraf

teġh-e-qātil jo mohabbat se lagī aa ke gale
taab ko us kī maiñ apnī rag-e-gardan samjhā

qātil ke dil kī kamzorī ne saarā kaam bigāḌ diyā
ham tishna-e-shauq-e-shahādat the ḳhanjar bhī thā dast-e-qātil meñ

phuul kā nazrāna le kar aayā is andāz se
aisā lagtā thā ki jaise vo mirā qātil na thā