Tags-Pyas

naqāb ulaT de jo baḌh kar ruḳh-e-tamannā se
ye aarzū hai ki mujh ko vo tishnagī denā

dil meñ mere pal rahī hai ye tamannā aaj bhī
ik samundar pī chukūñ aur tishnagī baaqī rahe

tirī nazar sabab-e-tishnagī na ban jaa.e
kahīñ sharāb mirī zindagī na ban jaa.e

har zarra mai-kada hai ye tishnagī salāmat
kyuuñ mātam-e-shikast-e-jām-o-subū kare hai

saaqī mujhe ḳhumār satā.e hai lā sharāb
martā huuñ tishnagī se ai zālim pilā sharāb

yam-ba-yam phailā huā hai pyaas kā sahrā yahāñ
ik sarāb-e-tishnagī hai mauja-e-sahbā yahāñ

'jaun' kī tishnagī kā thā ḳhuub hī mājrā ki jo
mīnā-ba-mīnā mai-ba-mai jām-ba-jām ho gayā

kar lī hai tauba is liye vaa.iz ke sāmne
ilzām-e-tishnagī mire saaqī ke sar na jaa.e

sar-e-sāhil bhī log pyāse haiñ
is ko āshob-e-tishnagī kahiye

subū liye tishnagī khaḌī thī ye jāntī thī
ki jāñ-faroshoñ ko qaus-e-shamshīr dekhtī hai

lab-e-furāt vahī tishnagī kā manzar hai
vahī husain vahī qātiloñ kā lashkar hai

maiñ jānūñ jab ki bujhā de tū tishnagī dil kī
vagarna aaj se dariyā dilī kā naam na le

ḳhudā kā shukr mirī tishnagī palaT aa.ī
chalī ga.ī thī samundar kā jab ishāra huā

sahrā meñ vafūr-e-tishnagī se
saa.e ko sahāb likh rahā huuñ

na rū-ba-rū kisī ḳhvāhish kī tishnagī hogī
na us ke hoñToñ kā shādāb zā.iqa hogā

yahī baa.is hai merī tishnagī kā
samundar mujh se paanī māñgtā hai

ye tishnagī-e-shahādat kā iqtizā ab hai
ki āb-e-teġh-e-sitam zahr meñ bujhā ke piyūñ

aañkh vaale sāvan meñ ek baat dekhī hai aur kah bhī duuñ tum se
tishnagī miTātā hai dil kī tishnagī kā ye qudratī shikārī hai

jo chaḌhā jaa.e ḳhumistān-e-jahāñ
haañ vahī lab-tishnagī darkār hai

pilā pilā ke nigāhoñ se bāda-e-taskīñ
baḌhā rahā hai koī aur tishnagī merī