lab-e-furāt vahī tishnagī kā manzar hai
vahī husain vahī qātiloñ kā lashkar hai
ye kis maqām pe laa.ī hai zindagī ham ko
hañsī laboñ pe hai siine meñ ġham kā daftar hai
yaqīn kis pe kareñ kis ko dost Thahrā.eñ
har āstīn meñ poshīda koī ḳhanjar hai
gila nahīñ mire hoñToñ pe tañg-dastī kā
ḳhudā kā shukr mirā dil abhī tavañgar hai
koī to hai jo dhaḌaktā hai zindagī ban kar
koī to hai jo hamāre diloñ ke andar hai
use qarīb se dekhā to ye huā mālūm
vo bū-e-gul nahīñ shamshīr-e-bād-e-sarsar hai
samajh ke aag lagānā hamāre ghar meñ tum
hamāre ghar ke barābar tumhārā bhī ghar hai
mirī jabīñ ko haqārat se dekhne vaale
mirī jabīñ se tirā āstāñ munavvar hai
tumhāre qurb kī lazzat nasīb hai jis ko
vo ek lamha hayāt-e-abad se behtar hai
hamārā jurm yahī hai ki haq-parast haiñ ham
hamāre ḳhuun kā pyāsā har ek ḳhanjar hai
vo mere sāmne aa.e to kis tarah aa.e
koī libās hai us kā na koī paikar hai
har ik balā se bachā.e hue hai jo ham ko
hamāre sar pe ye maañ kī duā kī chādar hai
bhaTak rahā huuñ maiñ sadiyoñ se dasht-e-ġhurbat meñ
koī to mujh ko batā.e kahāñ mirā ghar hai
abhī 'hafīz' gulāboñ kī baat mat kiije
lahūluhān abhī gulsitāñ kā manzar hai