Tags-Poverty

aaj se pahle kab the vatan meñ be-vatanī ke ye lachchhan
logoñ ko ye kahte sunā hai ghar bhī ġhurbat-ḳhāne haiñ

ye kyā manzil na aa.egī hamāre rū-ba-rū kab tak
raheñge dasht-e-ġhurbat meñ asīr-e-justajū kab tak

ro.e ġhurbat meñ hujūm-e-gul-e-sahrā.ī par
chaman-e-majma-e-yārān-e-vatan yaad aayā

miltī hai mujh ko lazzat us yaad kī chubhan se
ġhurbat meñ aa.e jaise apnā koī vatan se

phir bhī tere liye āvāra-e-ġhurbat hai 'ravish'
garche shāyān-e-mohabbat hai na milnā terā

haath phailā.e barahna sī khaḌī hai ḳhāmosh
jaise ġhurbat meñ musāfir ko sahārā na mile

ab us ġharīb chor ko bhejoge jail kyuuñ
ġhurbat kī jis ne kaaT lī pādāsh jeb meñ

sab pareshāñ haiñ ki āḳhir kis vabā meñ vo mire
jin ko ġhurbat ke alāva koī bīmārī na thī

ragaḌvā.īñ ye mujh se eḌiyāñ ġhurbat meñ vahshat ne
huā masdūd rasta jāda-e-rāh-e-vatan bigḌā

dasht-e-ġhurbat meñ ba-juz bekasī-o-yās-o-alam
qabr-e-majnūñ pe na koī pa.e mātam aayā

sabhī ko dukh hai ġhurbat kā
mujhe āsūdgī kā dukh

mil ga.e jab nirā-dishvar dasht-e-ġhurbat meñ 'na.īm'
ik nayā rishta azīmābād se joḌā gayā

chār-sū āñsuoñ ke jalte diip
shām-e-ġhurbat mujhe kahāñ laa.ī

ġhurbat meñ milā lutf kahīñ baḌh ke vatan se
hāsil jo huā tujh se mazā ham-safarī kā

shām-e-ġhurbat ham se majrūhoñ kī hai fariyād-ras
zulf kī chhātī phaTī hai sunte hī shāne kī arz

puurī paḌtī hī nahīñ un ko ridā-e-ġhurbat
paañv Dhak jaa.eñ agar un ke to sar khultā hai

jo de ārām Tak āvārgī 'mīr'
to shām-e-ġhurbat ik sub.h-e-vatan hai

ab pasar aa.e haiñ rishtoñ pe kuhase kitne
ab jo ġhurbat meñ hai naanī to navāse kitne

saath ġhurbat meñ koī ġhair na apnā niklā
maiñ faqat dard ke sahrā meñ akelā niklā