Tags-Phool

apnā rañg bhalā lagtā hai kaliyāñ chaTkīñ phuul banīñ
phuul phuul ye jhuum ke bolā kaliyo tum ko badhā.ī hai

ashk barsātī huī aatī hai gulshan meñ bahār
phuul khilte haiñ to shabnam kī tarī hotī hai

phuul kī tarah sabhī daaġh mahakne lag jaa.eñ
kaash aisā bhī kahīñ tarz-e-masīhā.ī ho

phuul parinde ḳhushbū bādal sab us kā saayā Thahre
us ne jab se ā.īne meñ ġhaur se ḳhud ko dekhā hai

tere nazdīk hī har-vaqt bhaTaktā kyuuñ huuñ
tū batā phuul ke jaisā maiñ mahaktā kyuuñ huuñ

phuul to kyā ḳhaar bhī manzūr haiñ
be-ruḳhī se yuuñ magar pheñko nahīñ

nazākat kā ye aalam phuul bhī toḌe to bal khā kar
na jaane dil mirā kis tarah toḌā pahlvāñ ho kar

yuuñ to kis phuul se rañgat na ga.ī bū na ga.ī
ai mohabbat mire pahlū se magar tū na ga.ī

kuchh is qadar the phuul zamīñ par khile hue
tāroñ ko āsmān meñ bonā paḌā mujhe

us kī ḳhush-bū se mahak kar phuul ban jaatā hai dil
mausam-e-gul kī tarah aatā hai vo jaatā hai vo

āñkhoñ kī kuchh nauras kaliyāñ nīm-shagufta ġhuncha-e-lab
kaise kaise phuul bhare haiñ gulchīnoñ ke dāman meñ

bulbul ke chahchahe haiñ na koī shagufta phuul
ai bāġhbāñ bahār-e-gulistāñ ko kyā huā

vaqt āḳhir le gayā vo shoḳhiyāñ vo bāñkpan
phuul se chehre the kitne aur the nāzuk badan

safed phuul mile shāḳh-e-sīm-bar ke mujhe
ḳhizāñ ko kuchh na milā be-libās kar ke mujhe

navā-e-murġh ko kahte haiñ ab ziyān-e-chaman
khile na phuul ise intizām kahte haiñ

merī surḳhī-e-tasavvur se haiñ kyuuñ nārāz aap
kyā harā peḌ aap tak bhī phuul le kar aa.egā

sharāb Dhaltī hai shīshe meñ phuul khilte haiñ
chale bhī aao ki ab donoñ vaqt milte haiñ

ye na pūchhe koī mausam-e-rañg kī pahlī pahlī adāvat ne kyā dukh diye
phuul kī aag par shab guzārī ga.ī ḳhaar kī nok par din guzārā gayā

dekh! gulshan meñ abhī shāḳh-e-tahayyur bāñjh hai
phuul honā hai to khilne kī aziyyat se na Dar

aaj dāman meñ phuul Daale the
jaise gulshan kī phir gadā.ī kī