tere nazdīk hī har-vaqt bhaTaktā kyuuñ huuñ
tū batā phuul ke jaisā maiñ mahaktā kyuuñ huuñ
maiñ na rātoñ kā huuñ jugnū na koī taara par
us kī āñkhoñ meñ magar phir bhī chamaktā kyuuñ huuñ
us pahelī kā koī hal to batāo yaaro
hijr kī rātoñ meñ ātish sā dahaktā kyuuñ huuñ
ghar banāyā hai tire dil meñ usī din se sanam
saarī duniyā kī nigāhoñ meñ khaTaktā kyuuñ huuñ
hāsidoñ ko baḌī tashvīsh hai is kī jānam
ban ke dhaḌkan maiñ tire dil meñ dhaḌaktā kyuuñ huuñ
jab tujhe mujh se mohabbat nahīñ ye batlā de
qatra qatra tirī āñkhoñ se Tapaktā kyuuñ huuñ