Tags-Nazakat

Tuk phuul chhuā thā so nazākat se ka.ī baar
rah rah ke dikhā.ī mujhe gul-hāt kī garmī

kyā nazākat hai sabā us kī kamar kī jis ne
sub.h-dam tār-e-rag-e-gul se qamar-bañd kiyā

nā-tavānī ne udhar paañv pakaḌ rakkhe haiñ
vo nazākat se girāñ-bār bane baiThe haiñ

naaz kī qāmat-e-zebā kī bayāñ kyā kiije
pairahan bhī jahāñ uslūb-e-nazākat māñge

nazākat kā ye aalam phuul bhī toḌe to bal khā kar
na jaane dil mirā kis tarah toḌā pahlvāñ ho kar

lachakte hī kamar zulf-e-rasā kī jhoñk lene se
asar ma.ashūq-pan kā hai nazākat aa hī jaatī hai

zor bal uf-re is nazākat par
ḳhalq kā dil dukhā.e baiThe haiñ

na bane kaam to kis kaam kī nāzuk shakleñ
nāzuk achchhe na hasīnoñ kī nazākat achchhī

mushābah kar diyā kyuuñ zo.af ne un kī nazākat se
mujhe ḳhud apne uupar rashk aayā nā-tavāñ ho kar

guloñ kā jo nikhrā huā sā badan hai
ajab hai nazākat ġhazab bāñkpan hai

hameñ to qatl kiyā bas isī nazākat ne
ki vo uThātī haiñ teġh aur nahīñ ukastī hai

va.ade the be-shumār magar ai mizāj-e-yār
ham yaad kyā dilā.eñ nazākat yahī to hai

'yāvar' ham ko pā na sakoge jaise ab haiñ aise kab the
dil kī nazākat jurm-e-mohabbat kufr-e-tamannā kyā nahīñ dekhā

vaqt kī nazākat kā aaj jo taqāzā hai jurm kal na kahlā.e
toḌ do ḳhamoshī ke āhanī hisāroñ ko khol do zabāñ logo

nazākat us ke qadam chūmtī hai dekhā hai
kaḌī pahan liye jis din ḳhirām ho na sakā

naaz hai gul ko nazākat pe chaman meñ ai 'zauq'
us ne dekhe hī nahīñ nāz-o-nazākat vaale

rah gayā aañkh meñ nazākat se
dil meñ naqsha tirā utar na sakā

lā-raib 'nasīm'-dehlavī to
ustād-e-nazākat-e-suḳhan hai

nazākat us gul-e-rānā kī dekhiyo 'inshā'
nasīm-e-sub.h jo chhū jaa.e rañg ho mailā