Tags-Nazakat

sambhal sambhal ke to chaltā hai vo sitāra bhī
tumhārī jaisī nazākat se kam nikaltā hai

kahīñ qayāmat na uTh khaḌī ho zamīn miltī hai āsmāñ se
baḌī nazākat kī ye ghaḌī hai mirī jabīñ un kā āstāñ hai

ai but-e-tauba-shikan maiñ tujh se mil kar sochtā huuñ
phuul meñ hotī nazākat kaash patthar se ziyāda

hai manzūr unheñ imtihāñ shauq-e-dil kā
nazākat kā ḳhālī bahāna nahīñ hai

dushnām-e-yār tab-e-hazīñ par girāñ nahīñ
ai ham-nafas nazākat-e-āvāz dekhnā

nazākat ne terī girāyā nazar se
sab kitne bhārī doshāle hue haiñ

nazākat hai na ḳhushbū aur na koī dilkashī hī hai
guloñ ke saath phir bhī ḳhaar ko rab ne jagah dī hai

is nazākat se to maiñ kaahe ko bismil hūñgā
tum chhurī pherte ho mujh ko ḳhabar kuchh bhī nahīñ

kab kālbud-e-ḳhāk meñ ho itnī nazākat
jo but hai vo putlā hai magar nāz-o-adā kā

yuuñ dekhte haiñ jaise udhar dekhte nahīñ
us lutf-e-be-ġharaz kī nazākat na pūchhiye

Thahrā huā hai vādi-e-ġham meñ ramīda vaqt
samjho bhī kuchh nazākat-e-bisyār kuchh kaho

dil pe kyā guzrī achānak tire aa jaane se
is nazākat ko bhalā kyā koī mehmāñ samjhe

zabāñ qaabū meñ hai sunñe ko tashbīheñ sune jaao
nazākat meñ kahāñ aurāq-e-gul us lab se jiite haiñ

ye maanā husn kī fitrat bahut nāzuk hai ai 'vāmiq'
mizāj-e-ishq kī lekin nazākat aur hotī hai

kyā lipaT jaa.eñ tirā qāmat samajh kar is ko ham
ye nazākat ye sabāhat hai kahāñ shamshād meñ

zamāna husn nazākat balā jafā shoḳhī
simaT ke aa ga.e sab aap kī adāoñ meñ

ye dhuāñ niiñ dard se bhartī hai aa.heñ jāñ-gudāz
kis nazākat saat ek ek ashk Tapkātī hai sham.a

nazākat kyā kahūñ ḳhurshīd-rū kī kal shab-e-mah meñ
gayā thā saa.e saa.e baaġh tak tis par harārat kī

bilā-sabab na thā us meñ vafūr-e-ḳhud-bīnī
ġhurūr-e-husn ke ham-rāh thī nazākat bhī

paḌī niiv aapas meñ go dostī kī magar dostī kis tarah nibh sakegī
use hai nazākat mujhe hai naqāhat na vo aane vaalā na maiñ jaane vaalā