Tags-Mohabbat

junūn-e-mohabbat meñ dīvāngī meñ tirī be-ruḳhī kā bhī maiñ qadr-dāñ huuñ
baḌā tū ne ehsān mujh par kiyā ye tamāshā banā kar tamāshā na dekhā

mohabbat kahāñ ye to bechārgī hai sitam bhī saheñ phir karam is ko samjheñ
ye jabr is liye kar liyā hai gavārā ki is ke sivā koī chārā na dekhā

niyāz-e-mohabbat se ye be-niyāzī ḳhulūs-e-mohabbat se itnā taġhāful
mirā dard tum ne mirā haal tum ne na jaanā na samjhā na pūchhā na dekhā

vo dāġh-e-mohabbat kā nishāñ pūchh rahe haiñ
hālāñki samajhte haiñ dikhāyā nahīñ jaatā

mohabbat se taufīq-e-iz.hār tak
pahuñchte pahuñchte zamāne lage

'jauhar' pe sitam tark-e-mohabbat kī hai tamhīd
ye jaur tumheñ aur bhī pyārā na banā de

biit gayā hañgām-e-qayāmat roz-e-qayāmat aaj bhī hai
tark-e-ta.alluq kaam na aayā un se mohabbat aaj bhī hai

svāñg ab tark-e-mohabbat kā rachāyā jaa.e
us ke pindār ko ā.īna dikhāyā jaa.e

vaz.a-dārī-e-mohabbat ke munāfī hai to ho
aaj collar pe nayā phuul sajāyā jaa.e

mirā ḳhulūs-e-mohabbat hai qadr ke qābil
zabāñ pe zikr-e-vafā hai use gilā na kaho

aap daulat ke tarāzū meñ diloñ ko tauleñ
ham mohabbat se mohabbat kā sila dete haiñ

āñkheñ jo uThā.e to mohabbat kā gumāñ ho
nazroñ ko jhukā.e to shikāyat sī lage hai

gilā bhī tujh se bahut hai magar mohabbat bhī
vo baat apnī jagah hai ye baat apnī jagah

donoñ aalam tirī nairañg adaa.ī ke nisār
ab koī chiiz yahāñ jeb-e-mohabbat meñ nahīñ

daulat-e-qurb ko ḳhasān-e-mohabbat jāneñ
chand ashkoñ ke sivā kuchh merī qismat meñ nahīñ

nashsha-e-ishq meñ har chiiz uḌī jaatī hai
kaun zarra hai ki sarshār mohabbat meñ nahīñ

zarre zarre meñ kiyā josh-e-tarannum paidā
ḳhud magar koī navā sāz-e-mohabbat meñ nahīñ

rahā pesh-e-nazar hasrat kā baab avval se āḳhir tak
paḌhī kis ne mohabbat kī kitāb avval se āḳhir tak

ḳhushī meñ bhī mohabbat dushman-e-sabr-o-sakūñ niklī
rahā dil meñ vahī ik iztirāb avval se āḳhir tak

maiñ tasavvur se kabhī jin ke laraz uThtā thā
vahī hālāt mohabbat kā bharam Thahre haiñ