vo ḳhud apnā dāman baḌhāne lage
chalo aaj aañsū Thikāne lage
hamārā burā vaqt jab Tal gayā
phir ahbāb milne-milāne lage
tirī barhamī meñ bhī jān-e-vafā
navāzish ke andāz aane lage
madavā-e-ġham kuchh to karnā hī thā
musībat paḌī gungunāne lage
mazā de gayā yaar daur-e-firāq
hameñ to ye din bhī suhāne lage
mohabbat se taufīq-e-iz.hār tak
pahuñchte pahuñchte zamāne lage
ye ġhunche bhī 'fārūq' kyā ḳhuub haiñ
khulī aañkh aur muskurāne lage