Tags-Kiss

bosa le kar mazā milā mujh ko
hanzal us kā zaqan hai aam nahīñ

aksar vo kahte haiñ ki jo bosa talab kare
is guftugū pe muñh ise kyūñkar lagā.iye

zulf ko kyuuñ jakaḌ ke bāñdhā hai
us ne bosa liyā thā gaal kā kyā

agar tum bosa-e-seb-e-zaqan se ho ga.e qātil
gale par pher diije mere chāqū meva-ḳhorī kā

bosa māñgūñ to kaheñ mujh se ye bulvā ke qarīb
kis kā muñh hai jo mire muñh ke vo muñh laa.e qarīb

us lab kā liyā bosa na kabhū haihāt na lipTā pāvoñ se
dil tujh se ba-rañg-e-pān-o-hinā ye bhī na huā vo bhī na huā

bosa māñgā to ye javāb milā
sīkhiye pahle ishq ke ādāb

kis tarah tum se na māñgeñ tumhīñ insāf karo
bosa lene kā sazā-vār dahan hai kis kā

ai sabza rañg-e-ḳhat bhī banā ab to bosa de
begāna thā jo sabza chaman se nikal gayā

shikār-e-basta-e-fitrāk ko tire maqdūr
huā na ye bhī ki bosa sar-e-rikāb to de

chhupāyā kar nahīñ hoñToñ ko muskurāte hue
ye jā-e-sharm nahīñ hai ye jā-e-bosa hai

bas ek bosa-e-sub.h aur ek bosa-e-shām!
faqīr-e-bosa huuñ aur iltijā-e-bosa hai

mire qarīb se hoñToñ ko mat guzār itnā
ki chal rahī mire sar meñ havā-e-bosa hai

tumhārī ḳhush-dahnī se hai asl meñ sarokār
ye lab kā bosa to bas ibtidā-e-bosa hai

bhale to lagte haiñ inkār-e-bosa par bhī ye hoñT
kabhī to ye kaho ''ye lab barā.e bosa'' hai

yahī na chhoḌ ke jā tishna-kām hoñToñ par
ki ye to bosa-e-sahv-e-qazā-e-bosa hai

har ek chiiz mayassar sivā.e bosa hai
aur apne ġham kā sabab iltavā-e-bosa hai

samajh meñ kuchh nahīñ aatā ki boltī ho kyā
laboñ pe kheltī phirtī nidā-e-bosa hai

lab-e-ḳhamosh pe bhī hai mire hī kaam kā harf
mirī murād ye bhī hai jo pā-e-bosa hai

labān-e-bosa-chashīda bhī ḳhuub haiñ lekin
nigah meñ ek but-e-nāḳhudā-e-bosa hai