Tags-Kashti

haañ sambhal jā ab ki zahr-e-ahl-e-dil ke aab haiñ
kitne tūfān terī kashtī ke liye be-tāb haiñ

jab nigal letā hai tūfāñ baḌh ke kashtī nuuh kī
ghuT ke jab insān meñ rah jaatī hai azmat ruuh kī

zamāne bhar se nirālī hai aap kī mantiq
nadī ko paar kiyā kis ne ulTī kashtī meñ

kahīñ najāt kā dariyā na sūkhne lag jaa.e
chalā kare mirī kashtī kā kārobār baras

phir bhī to kuchh sabāt ko us ke zarar nahīñ
ulTī ravāñ hai bahr meñ kashtī habāb kī

ḳhil.at shahīd-e-nāz ko bhijvāte haiñ javāb
kashtī meñ pahle phūloñ kī chādar lagā.iye

sailāb-e-ashk ne mire raste kiye haiñ band
kashtī mañgā ke muttasil-e-dar lagā.iye

ḳhush-baḳht ġharq bahr-e-takalluf meñ ho ga.e
TuuTe hue nasīb kī kashtī guzar ga.ī

'asad' juz āb-e-baḳhshīdan ze-dariyā ḳhizr ko kyā thā
Dubotā chashma-e-haivāñ meñ gar kashtī sikandar kī

par-e-parvāna shāyad bādbān-e-kashtī-e-mai thā
huī majlis kī garmī se ravānī daur-e-sāġhar kī

avval avval ḳhuub dauḌī kashtī-e-ahl-e-havas
āḳhir āḳhir Duub marne kā maqām aa hī gayā

tūfān-e-inqalāb se māyūsiyoñ ke ba.ad
kashtī pukārtī hai kinārā na chāhiye

apnī kashtī kā hai ḳhudā-hāfiz
pīchhe tūfāñ hai sāmne girdāb

hamāre dil ko bahr-e-ġham kī kyā tāqat jo le baiThe
vo kashtī Duub kab saktī hai jis ke nā-ḳhudā tum ho

dariyā ko apne paañv kī kashtī se paar kar
maujoñ ke raqs dekh le ḳhud ko utaar kar

ham jān-o-dil ko de chuke mauhūm umiid par
ab ho so ho Dubo de ye kashtī sharāb meñ

jab kashtī sābit-o-sālim thī sāhil kī tamannā kis ko thī
ab aisī shikasta kashtī par sāhil kī tamannā kaun kare

talavvun ik jazr-o-mad hai ḳhud hī thapeḌoñ meñ aa phañsī hai kashtī
ḳhabar hai muddat ke Duube dil kī ki aaj tak tah-nashīñ nahīñ hai

bhaag niklā thā jo tūfāñ se chhuḌā kar dāman
sar-e-sāhil vahī Duubā huā kashtī meñ milā

ḳhudā hī hai mirī kashtī kā hāfiz
ḳhudā ke vāste tū nāḳhudā jā