Bebak  Bhojpuri

fasl-e-bahaar jaane ye kya gul katar gai

Bebak Bhojpuri

Bhojpur, Bihar, India

1919-1984
fasl-e-bahār jaane ye kyā gul katar ga.ī
sāġhar guloñ kā ḳhūn-e-anādil se bhar ga.ī
gulzār-e-hast-e-būd meñ aarif kī āgahī
aurāq-e-gul pe sūrat-e-shabnam bikhar ga.ī
hāsil huzūr-e-husn kī sar-mastiyāñ kahāñ
tahzīb-e-asr lauT ke jaane kidhar ga.ī
dānishvaro vo ramz samajhne kī chiiz thī
nazar-e-vafā-shi.ār ḳhatā jo bhī kar ga.ī
ḳhush-baḳht ġharq bahr-e-takalluf meñ ho ga.e
TuuTe hue nasīb kī kashtī guzar ga.ī
gulshan ke dīda-var hī tah-e-dām aa ga.e
jaadū jagā ke ḳhuub nasīm-e-sahar ga.ī
shā.istagī ne ḳhair kā putlā banā diyā
barq-e-fanā bhī husn-e-adā pe Thahar ga.ī
almās-o-la.al bik ga.e mutlaq ḳhazaf ke mol
ab ābrū-e-hikmat-e-sāhab-hunar ga.ī
saaqī ko ḳhaas masnad-e-gul par jo aa.ī niiñd
sar-mastī-e-sharāb-e-ġham-e-mo'atabar ga.ī
itnī thī ik nafas ke tabassum ke dāstāñ
nāzuk kalī thī phuul banī aur bikhar ga.ī
yuuñ to suḳhan kī sūrat-e-ma.anī thī dil-pazīr
ḳhūn-e-jigar se aur haqīqat nikhar ga.ī
tai ho sake ḳhirad se na hastī ke marhale
nākāmiyoñ kī aah mirī kaam kar ga.ī
'bebāk' be-kasī ke hai juz kaun dast-gīr!
mauj-e-nafas hayāt kī jaane kidhar ga.ī
Top Urdushayar.com