Tags-Ibaadat

yaad aatā hai ḳhudā pal pal pal
aisī hālat meñ ibādat kaisī

koī 'beḳhud' kī jānib se zarā samjhā.e vaa.iz ko
ibādat ko farishte haiñ use mai-ḳhvār rahne deñ

raat masjid meñ añdherā to bahut thā lekin
yaad bhūlī sī koī rāh-e-ibādat thī mujhe

bole hasan ki vaah hameñ aur kareñ na pyaar
iqrār ke chuke haiñ shahanshāh-e-nām-dār

tumhārī zulf-e-siyah pe tanqīd kis se likhvāūñ tum hī bolo
'shrī-ibādat-barelvī' ko maiñ taar de kar bulā rahā huuñ

ye hijr-e-yār ye pābandiyāñ ibādat kī
kisī ḳhatā kī sazā hai ye zindagī to nahīñ

dast-e-qazā baḌhā hai mirī samt alvidā.a
ai etikāf-e-ishq ibādat tamām-shud

yahī hai farq zāhid aur āshiq kī ibādat meñ
ye apnā sar jhukātā hai vo apnā dil jhukāte haiñ

surḳh patthar ke sanam hoñ ki vo patthar ke sanam
but-kadoñ meñ to ibādat nahīñ hogī ham se

ai dhanvāno tum kyā jaano zauq-e-ibādat qadr-e-parstish
tum sab hiire motī le lo kar do mire havāle patthar

ham ahl-e-junūñ meñ bas yahī me.arāj-e-ibādat hai apnī
miltā hai jab un kā naqsh-e-qadam ham shukr kā sajda karte haiñ

us kī yaad aa.ī hai sāñso zarā āhista chalo
dhaḌkanoñ se bhī ibādat meñ ḳhalal paḌtā hai

farz barsoñ kī ibādat kā adā ho jaise
but ko yuuñ puuj rahe haiñ ki ḳhudā ho jaise

saudā-garī nahīñ ye ibādat ḳhudā kī hai
ai be-ḳhabar jazā kī tamannā bhī chhoḌ de

nazar aatī hai duniyā ik ibādat-gāh-e-nūrānī
sahar kā vaqt hai bande ḳhudā ko yaad karte haiñ

kyuuñ aa.e hosh meñ jo ibādat na kar sake
pīr-e-muġhāñ kī ham se itā.at na ho sakī

har ibādat-gāh se ūñchī haiñ mil kī chimniyāñ
shahr meñ har shaḳhs kā īmān aadhā rah gayā

jo qalb ko zindagī na baḳhshe nazar ko kaif-o-ḳhudī na baḳhshe
vo zauq-e-sajda hai nañg-e-sajda ibādat-o-bandagī nahīñ hai

dozaḳh bhī kyā gumān hai jannat bhī hai fareb
in vasvasoñ meñ merī ibādat bhī hai fareb