Tags-Hawa

kamāñ huā hai qad abrū ke gosha-gīroñ kā
tabāhe haal tirī zulf ke asīroñ kā

maiñ ik sitāra huuñ us ke falak se TuuTā huā
vo dhund hotī huī kahkashāñ hai mere liye

betāb havā ke jhoñkoñ kī fariyād sune to kaun sune
maujoñ pe taḌaptī kashtī hai aur gūñgā bahrā paanī hai

tīrgī fitna-e-shahvat ko havā detī hai
chāndnī raqs pe majbūr kiyā kartī hai

havā maiñ bhī dāḳhil-e-kushtgāñ to abas tū hove hai sar-garāñ
ki mire gale kī taraf miyāñ tire āb-e-teġh kā Dhaal thā

diyā khā ke aap ne paan jo dil-e-mubtalā huā surḳh-rū
use samjhā peT kā bojh vo jo tumhāre muñh kā ugaal thā

jo chaman se duur qafas huā to maiñ aur asīr-e-havas huā
ye jo zulm ab ke baras huā yahī qahr agle bhī saal thā

zarā haTe to vo mehvar se TuuT kar hī rahe
havā ne nochā unheñ yuuñ ki bas bikhar hī rahe

maiñ vo TuuTā huā taarā jise mahfil na raas aa.ī
maiñ vo shola jo shab bhar aañkh ke paanī meñ rahtā hai

aañkh be-ḳhvāb huī hai kaisī
ye havā ab ke chalī hai kaisī

jab chalī ThanDī havā bachcha ThiThur kar rah gayā
maañ ne apne laal kī taḳhtī jalā dī raat ko

jaise havā kā jhoñkā thā aa kar guzar gayā
vo shaḳhs is ke ba.ad kahāñ dastiyāb thā

saarā kalām us se muanvan huā 'hayāt'
jis kā vajūd ḳhud bhī mukammal kitāb thā

kisī se kam na huā 'nāz' fāsla ġham kā
ki log jitnā chale utnī dūriyāñ jāgīñ

tanhā.ī ke lamhāt kā ehsās huā hai
jab tāroñ bharī raat kā ehsās huā hai

kuchh ḳhud bhī huuñ maiñ ishq meñ afsurda o ġhamgīñ
kuchh talḳhi-e-hālāt kā ehsās huā hai

kyā dekhiye un tīra-nasīboñ kā ho anjām
din meñ bhī jinheñ raat kā ehsās huā hai

vo zulm bhī ab zulm kī had tak nahīñ karte
āḳhir unheñ kis baat kā ehsās huā hai

bāzī-gah-e-ālam meñ to ik khel hai jiinā
is khel meñ kab maat kā ehsās huā hai

ruḳh par tire bikhrī huī zulfoñ kā ye aalam
din kā to kabhī raat kā ehsās huā hai