Tags-Hawa

umr ik hafta nahīñ baaġh meñ ai gul mat phuul
rañg badle hai zamāne kī havā tīsre din

haath phailā.e hue maañg rahī hai kyā raat
kyuuñ añdheroñ meñ havā ro.e chalī jaatī hai

nikal ke ghar se aur maidāñ meñ aa ke
zarā kuchh dekhiye tevar havā ke

bhalā huā ki na haath aayā jāma-e-pur-zar
gazī ke kapḌe badalte to ham badal jaate

havā kī larzisheñ dahkātīñ āriz-o-lab ko
hayā kī mauj se saarā badan gulābī ho

mujh ko ehsās-e-rañg-o-bū na huā
yuuñ bhī akasr bahār aa.ī hai

bach jaa.e javānī meñ jo duniyā kī havā se
hotā hai farishta koī insāñ nahīñ hotā

tujh se bichhaḌ ke samt-e-safar bhūlne lage
phir yuuñ huā ham apnā hī ghar bhūlne lage

dil kā mo.āmla jo supurd-e-nazar huā
dushvār se ye marhala dushvār-tar huā

ubhrā har ik ḳhayāl kī tah se tirā ḳhayāl
dhokā tirī sadā kā har āvāz par huā

rāhoñ meñ ek saath ye kyuuñ jal uThe charāġh
shāyad tirā ḳhayāl mirā ham-safar huā

simTī to aur phail ga.ī dil meñ mauj-e-dard
phailā to aur dāman-e-ġham muḳhtasar huā

lahrā ke terī zulf banī ik hasīn shaam
khul kar tire laboñ kā tabassum sahar huā

pahlī nazar kī baat thī pahlī nazar ke saath
phir aisā ittifāq kahāñ umr bhar huā

dil meñ jarāhatoñ ke chaman lahlhā uThe
'muztar' jab us ke shahr se apnā guzar huā

jalegā dil to dhuāñ uThegā ye aag aise nahīñ bujhegī
nagar nagar ye ḳhabar pahuñchtī magar havā kī ajab dishā thī

shola-e-jāñ ko havā detī hai ḳhud bād-e-sumūm
shola-e-jāñ kī tarah chāk-garebāñ chaliye

'hāmid' harīm-e-zāt meñ ḳhud apnī dekhiye
āḳhir chhupā huā hai yahāñ kaun barq-vash

achchhā huā tahī haiñ zar-e-bandagī se ham
har moḌ par hujūm khaḌā hai ḳhudāoñ kā

gumān toḌ chukā maiñ magar nahīñ koī hai
sarā-e-fikr meñ baiThā huā kahīñ koī hai