Tags-Hawa

sameT lo mujhe apnī sadā ke halqoñ meñ
maiñ ḳhāmushī kī havā se bikharne vaalā huuñ

dil kā saarā ghor añdherā duur huā
kis kā hai ye nuur jo maiñ pur-nūr huā

zaḳhm risā phir zaḳhm-e-dil nāsūr huā
rafta rafta jaise bhāgalpūr huā

yuuñ to ham ne qisse likkhe rañgā-rañg
lekin ġham kā qissa hī mash.hūr huā

paanī paanī chīḳh rahā thā pyāsā dil
shahr-e-sitam kā kaisā ye dastūr huā

kaisā mulk-shor bapā hai ḳheme meñ
āñkheñ suunī dil kā shīsha chuur huā

ab ke mausam sadiyoñ kā tahzībī rañg
ḳhatm huā barbād huā kāfūr huā

shahr meñ tere kis se gilā phir karte ham
'aḳhtar' jab apnā hī saaya duur huā

ye mo.ajiza sirf ek shab kī masāfatoñ ke sabab huā hai
tumhāre aur mere darmiyāñ ke hijāb saare jhulas ga.e haiñ

tere badan kī dhuup se mahrūm kab huā
lekin ye isti.āra bhī manzūm kab huā

yuuñ huā ruḳhsat rahī baaqī na milne kī umiid
yuuñ milā vo jaise muddat kā koī bichhḌā milā

jitne patthar havā ke haath meñ haiñ
sar-e-ḳhāk itne aa.ine hī nahīñ

un meñ uljhā huā hai kyuuñ 'sayyad'
yaar jo tere mas.ale hī nahīñ

jab havā chaltī hai uḌtā huuñ muḳhālif samt meñ
aur jab tham jaa.e tab apnī taraf bahtā huuñ maiñ

shor meñ Duubā huā hai ghar tamām
aur sannāTā pas-e-dīvār hai

maiñ huā be-lutf us ke qurb se
vo bhī merī shakl se bezār hai

sard sī shāmoñ meñ chaltī hai udāsī kī havā
chāñdnī raat bhī ḳhāmosh rahā kartī hai

jo bas chale to vo simTā le har numū-e-badan
hayā se apnī koī yuuñ thakā huā na milā

mujhe kab kisī kī umañg thī mirī apne aap se jañg thī
huā jab shikast kā sāmnā to ḳhayāl terī taraf gayā

farāz-e-arsh se TuuTā huā koī taara
kahīñ se DhūñD ke laao baḌā añdherā hai