Tags-Hawa

ye alāmat kaun sī hai kis se pūchhūñ ai havā
pahlī rut meñ har shajar par zard pattā dekhnā

sadma hāsil huā alam laa.e
aur kūche se us ke laate kyā

apnī hālat pe aaj rotā hai
dil-e-dīvāna ko huā kyā hai

huā yuuñ karte haiñ tūfāñ se log ḳhauf-zada
ki jaise us ke thapeḌoñ meñ kuchh mazā hī nahīñ

maiñ tire sañg kaise chalūñ ham-safar tū samundar hai maiñ sāhiloñ kī havā
tū kahāñ maiñ kahāñ al-amāñ al-hazar tū samundar hai maiñ sāhiloñ kī havā

tujh se hai sab ye husn-e-jahāñ mo'tabar tujh ko sajde kare kahkashāñ sar ba-sar
tū harīm-e-qamar maiñ hazīn-e-sahar tū samundar hai maiñ sāhiloñ kī havā

gaah shorīda-sar gaah ḳhāmosh-tar tujh meñ poshīda haiñ raaz sab basta-sar
tere lāl-o-gohar aur maiñ ḳhāk-sar tū samundar hai maiñ sāhiloñ kī havā

tū bahāroñ kī jā tū libās-e-shajar maiñ ḳhizāñ kī sadā maiñ ġhubār-e-safar
tū numūd-e-matar maiñ hadīs-e-digar tū samundar hai maiñ sāhiloñ kī havā

vus.at-e-be-karāñ maḳhzan-e-sīm-o-zar be-had-o-be-nishāñ terī har rah-guzar
tū ba-hadd-e-nazar maiñ kanār-e-safar tū samundar hai maiñ sāhiloñ kī havā

taptī riit jhulaste saa.e tund havā
ghar se niklā mom kā paikar jaane kyuuñ

ye dil vāloñ se pūchho is ko dil vaale samajhte haiñ
bigāḌ aa.ī havā zulfeñ kisī kī yā sañvār aa.ī

hue ġharq-e-araq jo sharm-e-isyāñ se vo paak uTThe
huā karte haiñ paidā gauhar-e-shahvār paanī meñ

habs chhaT jaa.e diyā jaltā rahe
ghar bas itnā hī havā-dār achchhā

kis haal meñ kalām-e-balāġhat huā atā
shā.er hai bath-rōm meñ saame ko kyā patā

thā mirī pusht pe sūraj to ye ehsās huā
mujh se ūñchā to mire saa.e kā qad hai had hai

darmiyāñ jo fāsla rakkhā huā sā hai abhī
ik yahī us tak pahuñchne kā vasīla hai abhī

na qaid-e-shar.a baaqī hai na āzādī kī hai kuchh had
nahīñ kuchh guftugū is baab meñ ye nek hai yā bad

dekhne dekhne meñ farq huā kartā hai
tumhī batlāo ki kaisā nazar aatā hai mujhe

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ye kah rahā hai tarannum havā kī maujoñ kā
ḳhamosh phūloñ kā husn-e-bayāñ nahīñ miltā