Tags-Hawa

shab kī havā se haar ga.ī mere dil kī aag
yaḳh-basta shahr meñ koī radd-o-badal na thā

furqat meñ muñh lapeTe maiñ is tarah paḌā huuñ
jis tarah koī murda lipTā huā kafan meñ

hijr kā chāñd dahaktā huā añgāra sahī
magar is se bhī kahīñ shola fuzūñ hai merā

ġham kā zahrāb rag o pai meñ jo utrā 'ishrat'
tab ye mālūm huā mujh ko vo kyuuñ hai merā

Daalo mire kānoñ meñ bhī pighlā huā siisa
ai barhamno maiñ ne bhī to ved sunā hai

havā ke dosh par lagtā hai uḌne
jo patta TuuT jaatā hai shajar se

ḳhuun se jaltā ek diyā hai lafzoñ kī dīvār ke pīchhe
aaj bhī kitnī garm havā hai lafzoñ kī dīvār ke pīchhe

jab kisī tamtamāte hue jism kā sarsarātā huā pairahan
ras-bhare santare ke chamakdār chhilke kī mānind utarne lagegā

kuchh havā kā bhī haath thā varna
parda yuuñ hī hilā nahīñ hotā

vo merī zaat ke partav se māhtāb huā
vagarna kurra-e-be-nūr kis shumār meñ thā

'shu.ūr' aayā huā baiThā hai kab se
ye be-hoshī ye ġhaflat ai dil ai dil

ye bayābāñ ye shab-e-māh ye ḳhunkī ye havā
ai ḳhizāñ tujh ko bhī andāz-e-bahār aa hī gayā

bād-e-manzil bhī na mahsūs huā mujh ko 'shafīq'
marhabā salle-alā kūcha-e-yār aa hī gayā

shu.ūr gum huā dīvāngī hai khoī huī
ḳhudā hī jaane maiñ kis manzil-e-hayāt meñ huuñ

kun ke kahne meñ jo huā so huā
raañD ronā na ro huā so huā

jo azal meñ qalam chalī so chalī
bad huā yā niko huā so huā

rañj o rāhat meñ iḳhtiyār nahīñ
raazī ho yā na ho huā so huā

yuuñ na ho yuuñ ho yuuñ huā so kyuuñ
kyā hai ye guftugū huā so huā

shikva qismat kā shikva-e-haq hai
bak na ḳhāmosh ho huā so huā

haath aatā nahīñ baġhair nasīb
paañv phailā ke so huā so huā