Tags-Hawa

sila ye manzil-e-maqsūd kā milā 'shādāb'
safar tamām huā aur ham-safar bhī gayā

haa.e ye taaza havā gulshan meñ kaisī chal paḌī
bulbul-e-bāġh-o-bahārāñ rū-ba-sahrā ho gayā

mirā vajūd havāla tirā huā āḳhir
to khā gayā nā mujhe tū mire savāl-e-qadīm

rukā huā thā vo qāfila to magar abhī tak
ġhubār apnī hī be-karānī meñ jā rahā thā

le uḌe abr ke TukḌoñ ko havā ke jhoñke
suukh kar baiTh ga.iiñ ḳhaak meñ jhīleñ kachchī

khel karne ko bahut the dil-e-ḳhvāhish-dīda
kyuuñ havā dekh jalāyā diyā pahle pahle

dostī kā chalan rahā hī nahīñ
ab zamāne kī vo havā hī nahīñ

ġhuncha-e-dil mard kā roz-e-azal jab khul chukā
jis qadar taqdīr meñ likkhā huā thā mil chukā

koī āseb-e-balā hai shahr par chhāyā huā
bū-e-ādam-zād tak ḳhālī makānoñ meñ nahīñ

ham zūd-farāmoshī ke liye badnām bahut haiñ phir bhī 'bashar'
jab jab bhī chalī madmātī pavan uḌtā huā āñchal yaad aayā

vo āñkheñ jin se mulāqāt ik bahāna huā
unheñ ḳhabar hī nahīñ kaun kab nishāna huā

sitāra-e-saharī kā bharosa mat kiijo
na.e safar meñ ye raḳht-e-safar purānā huā

na jaane kaun sī ātish meñ jal bujhe ham tum
yahāñ to jo bhī huā hai darūn-e-ḳhāna huā

kuchh is tarah se vo shāmil huā kahānī meñ
ki is ke baad jo kirdār thā fasāna huā

usī sitāre ne bhaTkā diyā sar-e-manzil
safar pe jo mirī tahvīl meñ ravāna huā

sunā hai tujh ko to ham yaad bhī nahīñ aate
ye imtihāñ to nahīñ ye to āzmānā huā

hameñ to ishq muqaddar hai jaise rizq 'salīm'
so chal paḌeñge jahāñ apnā āb-o-dāna huā

tum na aa.e to bas huā itnā
kal charāġhoñ meñ raushnī kam thī

kuchh aisā huā be-sar-o-sāmān mirī jaañ
duniyā mujhe kahne lagī nādān mirī jaañ