Tags-Hawa

sitam to ye hai ki hai merī dāstāñ aur maiñ
sharīk-e-matn nahīñ hāshiya banā huā huuñ

kabhī thā qais kabhī 'mīr' aur ab 'fartāsh'
sulūk-e-ishq kā ik silsila banā huā huuñ

tum sar-e-bām aa kar
uThāyā huā haath apnā hilā kar

chāñd ko maiñ ne jab bhī dekhā ye ehsās huā
ik sahrā meñ ik dīvāna kaafī hotā hai

duur tak phailā huā dasht-e-balā hai bāhar
apnī mahfil se na mujh ko mire dildār uThā

apnā nuqsān barābar kā huā āñdhī meñ
ab kisī shāḳh pe phaltā nahīñ tū bhī maiñ bhī

zehn meñ ehsās-e-ruḳhsat hī na hogā shaam tak
baḌhte baḌhte din ke lamhe yuuñ havā ho jā.eñge

vafā ke baab meñ kār-e-suḳhan tamām huā
mirī zamīn pe ik ma.arka lahū kā bhī ho

mutma.in thā maiñ ki āñdhī ko thame arsa huā
ġhaur se dekhā to qābiz thī dil-o-jān meñ ḳhaak

tū apne pindār kī ḳhabar le ki ruḳh havā kā badal rahā hai
tirī nazar se bahakne vaalā fareb khā kar sambhal rahā hai

us ke sunñe ke liye jama.a huā hai mahshar
rah gayā thā jo fasāna mirī rusvā.ī kā

yād-e-ayyām ki kuchh sar meñ samā.ī thī havā
ab vo TuuTā huā pindār kahāñ se lā.ūñ

uTh ke kapḌe badal ghar se bāhar nikal jo huā so huā
raat ke ba.ad din aaj ke ba.ad kal jo huā so huā

jab talak saañs hai bhuuk hai pyaas hai ye hī itihās hai
rakh ke kāñdhe pe hal khet kī or chal jo huā so huā

ḳhuun se tar-ba-tar kar ke har rahguzar thak chuke jānvar
lakḌiyoñ kī tarah phir se chūlhe meñ jal jo huā so huā

jo marā kyuuñ marā jo luTā kyuuñ luTā jo jalā kyuuñ jalā
muddatoñ se haiñ ġham in savāloñ ke hal jo huā so huā

mandiroñ meñ bhajan masjidoñ meñ azaañ aadmī hai kahāñ
aadmī ke liye ek taaza ġhazal jo huā so huā

nākām hī dil jo rahnā thā nākām rahā achchhā hī huā
ab kiije kisī kā shikva kyā jo kuchh bhī huā achchhā hī huā

kuchh manzil kā ġham baḌh jaatā kuchh rāheñ mushkil ho jātīñ
is taptī dhuup meñ zulfoñ kā saaya na milā achchhā hī huā

ab rāh-e-vafā ke patthar ko ham phuul nahīñ samjheñge kabhī
pahle hī qadam par Thes lagī dil TuuT gayā achchhā hī huā