Tags-Hawa

vo ek abr kī mānind mere uupar se
havā ke saath uḌā aur ho gayā ġhā.eb

ḳhaak uḌātā hai abhī dasht-e-talab hī meñ 'salām'
dil-e-rusvā ye huā hai abhī rusvā bhī kahāñ

fasīl-e-sañg kī mahdūdiyat halākat hai
uḌā de ḳhud ko havā meñ to sansanā.egā kuchh

kahtā na thā ki har dam us kī galī meñ mat jā
is baat kā ab āḳhir charchā 'hasan' huā na

us kā badan jhukā huā patthar kī bench par
apne qadam bhī muḌte hue ghaas kī taraf

ashiyā kī lazzatoñ meñ aTaktā huā badan
aur ruuh kā khiñchāv hai ban-bās kī taraf

ġham ke parde meñ ḳhushī bhī to chhipī hotī hai
ḳhush huā maiñ jo mire paañv meñ chhālā chamkā

har aañkh meñ thī TūTte lamhoñ kī tishnagī
har jism pe thā vaqt kā saaya paḌā huā

aa.egī raat muñh pe siyāhī male hue
rakh degā din bhī haath meñ kāġhaz phaTā huā

kyā kahūñ maare ḳhushī ke haal merā kyā huā
aamad aamad jo huī kal nā-gahānī aap kī

ham ne sau rāteñ jagā.īñ tab huā ye ittifāq
so usī din ko dharī thī niiñd aanī aap kī

Dar na rahā mauj-e-balā kā ruḳh bhī phirā duniyā kī havā kā
ronā kyā hai dukh sāgar kā us ke ham par ehsāñ haiñ

tū hasīñ hai to kyā huā jānāñ
maiñ bhī sūrat nikhār baiThā huuñ

ham mai-kashoñ ko pī kar ye infi.āl aayā
ra.asha paḌā huā hai ek ek uzv-e-tan meñ

ḳhāna-ḳharābī apnī yaad aa.ī jī bhar aayā
ujḌā huā jo dekhā ik āshiyāñ chaman meñ

din raat ke aañsū sahar o shaam kī aaheñ
is baaġh kī ye āb-o-havā yaad rahegī

khā ga.ī garmi-e-jazbāt ko rasmoñ kī havā
aaj har shaḳhs faqat barf kī almārī hai

ibn-e-maryam huā kare koī
mere dukh kī davā kare koī

bahut tez nafrat kī ye āñdhiyāñ haiñ
uḳhuvvat kī ThanDī havā chāhtā huuñ

Tāñktī phirtī haiñ kirneñ bādaloñ kī shaal par
vo havā ke haath meñ goTā kanārī de gayā