Tags-Hawa

havā kī zad pe charāġh-e-shab-e-fasāna thā
magar hameñ bhī usī se diyā jalānā thā

har shaam dilātī hai use yaad hamārī
itnī to havā kartī hai imdād hamārī

phir huā dard-e-tamannā bedār
phir dil-e-ḳhāk-basar yaad aayā

havā meñ haath ghumāyā ġhazal nahīñ aa.ī
uchak ke phuul hī kāġhaz pe dhar liyā maiñ ne

surūr-o-kaif kā aalam hadoñ ko chhūtā huā
ḳhudī kā nashsha hai kuchh āgahī hai aur maiñ huuñ

aap tashrīf laa.e the ik roz
dūsre roz e'tibār huā

pahle kyā thā jo kiyā karte the tārīf mirī
ab huā kyā jo burā ho gayā achchhā ho kar

ik naqsh mauj-e-āb se barham huā to kyā
ik naqsh zer-e-āb ubharne meñ lag gayā

kisī kā yuuñ to huā kaun umr bhar phir bhī
ye husn o ishq to dhokā hai sab magar phir bhī

tumhāre sach kī hifāzat meñ yuuñ huā akasr
ki apne-āp ko jhūTā banā liyā maiñ ne

har adālat likh chukī hai faisla to kyā huā
faisla baaqī abhī ik āsmānī aur hai

muddatoñ ba.ad pashemāñ huā dariyā ham se
muddatoñ ba.ad hameñ pyaas chhupānī aa.ī

paḌe hue haiñ jalī-bujhī cigaretoñ ke TukḌe har ik jagah par
aur ek chehra shagufta chehra tamām ghar meñ basā huā hai

lagā rahī hai mujhe sadā-e-havā darīche se laḌte laḌte
mirā ye kamra ḳhamosh kamra kisī kī aahaT se bhar gayā hai

bulā rahīñ haiñ mujhe dobāra udāsiyoñ kī hasīn vaadī
kisī kī yādoñ kā sabz-mausam abhī bhī taaza banā huā hai

kyuuñ sajā letā hai palkoñ pe ye ashkoñ ke charāġh
ai havā kuchh to batā phuul se rishta kyā he

ye itnī raat ga.e kaun dastakeñ degā
kahīñ havā kā hī us ne na ruup dhārā ho

'shu.ūr' aa jaao mere sāth, lekin!
maiñ ik bhaTkā huā sā aadmī huuñ

havā meñ phirte ho kyā hirs aur havā ke liye
ġhurūr chhoḌ do ai ġhāfilo ḳhudā ke liye

tapish se dil kā ho kyā jaane siine meñ kyā haal
jo tere tiir kā rauzan na ho havā ke liye