Tags-Hawa

mulk meñ firqa-parastoñ kī huā chal hī ga.ī
na kisī ne sarzanish kī na unheñ Tokā gayā

ye haal hai naqd-e-dil ko kho kar
jaise koī luTā huā ho

allāh kare nāma-e-amal par
terā naqsha khiñchā huā ho

ġham-e-jānāñ ke sivā kuchh hameñ pyārā na huā
ham kisī ke na hue koī hamārā na huā

kyā usī kā hai vafā nām-e-mohabbat hai yahī
mehrbāñ ham pe kabhī vo sitam-ārā na huā

laakh tūfān-e-havādis ne qadam thaam liye
merī ġhairat ko palaTnā bhī gavārā na huā

dil vahī dil hai haqīqat kī nazar meñ ai dil
sard jis dil meñ mohabbat kā sharārā na huā

DhūñDhtā aa.egā kal ahl-e-mohabbat ko yahī
ġham nahīñ aaj zamāna jo hamārā na huā

ahl-e-duniyā ne masarrat hī masarrat chāhī
ham ko is ġham ke sivā kuchh bhī gavārā na huā

jaan dī hai dil-e-ḳhuddār ne kis mushkil se
aaj bālīñ pe vo ḳhud-bīn-o-ḳhud-ārā na huā

aañkh sū-e-haram-o-dair kabhī uTh jaatī
ishq kī raah meñ ye bhī to gavārā na huā

ḳhaak chhānī chaman-o-dasht kī barsoñ 'faizī'
aah taskīn-e-nazar koī nazārā na huā

baḌhā kar rabt kyūñkar kam na muñh dikhlā.e vo mah-rū
huā jab māh-e-kāmil din pe din us ko tanazzul hai

zard pattoñ ko le ga.ī hai havā
shāḳh meñ shiddat-e-numū hai abhī

maiñ ek qatra huuñ merā alag vajūd to hai
huā kare jo samundar mirī talāsh meñ hai

burā na maane to ik baat pūchhtā huuñ maiñ
kisī kā dil kabhī tujh se bhī ḳhush huā hargiz

mire kahe ko amānat samajhnā mauj-e-havā
maiñ aane vaale zamānoñ se kar rahā huuñ ḳhitāb

jis qadar bhī havā hai ḳhālī hai
ye jahāñ khokhlā hai ḳhālī hai

ab kaun batā.e vahshat meñ kyā khonā hai kyā paayā hai
hāthoñ kā huā shohra bhī bahut dāman ne sahe sadme bhī bahut

bijlī har lahar se paidā ho tire kūche meñ
le mirā har nafas-e-garm havā kā bosa