Tags-Hawa

jāda-e-nūr ko Thokar pe sajātā huā maiñ
dekhtā rahtā huuñ rañgoñ kī pur-afshānī ko

hai abr kī chādar shafaqī josh se gul ke
maiḳhāne ke haañ dekhiye ye rañg havā kā

barsoñ se tū yuuñ hai ki ghaTā jab umañD aa.ī
tab dīda-e-tar se bhī huā ek jhaḌākā

chāñd ḳhushbū havā sitāre gul
khil uThe jab vo gungunātā hai

vahāñ kaise koī diyā jale jahāñ duur tak ye havā na ho
unheñ hāl-e-dil na sunā.iye jinheñ dard-e-dil kā pata na ho

na diye kā hai na havā kā hai yahāñ jo bhī kuchh hai ḳhudā kā hai
yahāñ aisā koī diyā nahīñ jo jalā ho aur vo bujhā na ho

bigḌī huī hai mai-kada-e-dahr kī havā
ho jaa.eñ shaiḳh-jī bhī na mai-ḳhvār āj-kal

gul kar diyā charāġh-e-ma.īshat tū ai havā
me.ada ke bhī na ghis ga.e kyuuñ ḳhaar āj-kal

huā jab aqd to bāñTī mire saale ne shīrīnī
magar us meñ se thoḌī sī bachā kar jeb meñ rakh lī

havā bhī garm hai chhā.e haiñ surḳh bādal kyuuñ
ye zulm kis pe huā roī ḳhāk-e-maqtal kyuuñ

safīr-e-shab kā koī ashk DhūñDte hoñge
havā ke jalte hue hoñT sard shāḳhoñ par

havā kī god meñ mauj-e-sarāb bhī hogī
gireñge phuul to Thahregī gard shāḳhoñ par

ab jā kar ehsās huā hai pyaar bhī karnā thā
pyaar jo karnā thā us kā iz.hār bhī karnā thā

urūs-e-maut se jaldī hai kis ko milne kī
qadam baḌhā huā ye sū-e-dār kis kā hai

parda rahā ki jalva-e-vahdat-numā huā
ġhash ne ḳhabar na dī mujhe kab sāmnā huā

dushman kī dostī kā natīja burā huā
ḳhanjar gale milā to mirā sar judā huā

mahshar meñ rañg-e-chehra-e-zālim havā huā
sach hai burā huā ki mirā sāmnā huā

gulshan se uTh ke merā makāñ dil meñ aa gayā
ik daaġh ban gayā hai nasheman jalā huā

kyā tīrgī liye hue aa.ī shuā-e-nūr
dekhā shab-e-firāq azal kā likhā huā

ghar dil meñ kar chukā hai mirā nauha-e-qafas
sayyād qaid hogā agar maiñ rihā huā