Tags-Hawa

agar ye maut kā saaya nahīñ to phir kyā hai
qadam qadam pe bulātā huā sā kuchh to hai

na jaag uThā ho kahīñ biitī umr kā lamha
ragoñ meñ shor machātā huā sā kuchh to hai

ta.alluqāt kī ḳhushbū ki rishta-e-māzī
tumhārī bazm se jaatā huā sā kuchh to hai

ik ehtimām-e-ḳhusūsī ke bāvajūd 'ḳhumār'
ye fāsloñ ko baḌhātā huā sā kuchh to hai

tū ne kuchh qadr na kī ye baḌā nuqsān huā
tere gulshan ke liye fasl-e-bahārī maiñ thī

ai jāda-e-ḳhirām-e-mah-o-mahr dekhnā
terī taraf bhī aaj havā ke qadam ga.e

raat ye kaun mire ḳhvāb meñ aayā huā thā
sub.h meñ vādi-e-shādāb meñ aayā huā thā

ik parinde kī tarah uḌ gayā kuchh der huī
aks us shaḳhs kā tālāb meñ aayā huā thā

maiñ bhī us ke liye baiThā rahā chhat par shab bhar
vo bhī mere liye mahtāb meñ aayā huā thā

sard ḳhitte meñ sulagtā huā jañgal thā badan
aag se niklā to barfāb meñ aayā huā thā

ye to sad-shukr ḳhayāloñ ne tire khīñch liyā
maiñ to hālāt ke girdāb meñ aayā huā thā

yaad haiñ dil ko mohabbat ke shab-o-roz 'hasan'
gaañv jaise koī sailāb meñ aayā huā thā

havā ne ehtirām-e-mahfil-e-qudsī meñ apnā.ī ravish gul kī
fidā is ḳhāmushī par jauhar-e-taqrīr thā kal shab jahāñ maiñ thā

insān kā havā pe madār-e-hayāt hai
kyā zindagī meñ jaan hai dam kā bharam ġhalat

samundar tū huā khārī to kaise
nadī jab koī bhī khārī nahīñ hai

kyā yahī ḳhvāb kī ta.abīr huā kartī hai
uḌ ga.ī niiñd bhī āñkhoñ kī kahānī sun kar

tārīḳh ke safhāt meñ koī nahīñ ham-sar mirā
mahv-e-safar hai aaj tak pheñkā huā patthar mirā

har samt sehn-e-zāt meñ phaile hue saa.e mire
baiThā hai taḳht-e-fikr par simTā huā dilbar mirā

ik rañg-e-istiġhrāq hai ik nik.hat-e-āvārgī
Thahrā huā gāgar meñ hai bahtā huā sāgar mirā

jis meñ amal kā josh nahīñ vo shabāb kyā
mastī to dil meñ chāhiye shaġhl-e-sharāb kyā