Tags-Hawa

jaadū fazā kā thā ki havā meñ milā thā zahr
patthar hue jahāñ the vahīñ be-shumār log

kis khañDar meñ hameñ mahbūs havā le aa.ī
shab ke siine meñ bhī mahfūz makāñ thā pahle

bādbāñ kashtiyāñ phir mauj-e-havā kī raunaq
kaun kis haal meñ aur kaun kahāñ thā pahle

havā kī rāh-numā.ī pe shak nahīñ rakhte
ham apne paañv ke nīche saḌak nahīñ rakhte

havā dahāḌ ke Takrā.e bhī to kyā hāsil
pahāḌ apne badan meñ lachak nahīñ rakhte

gum apnī havā meñ haiñ machhere
mauj apnī jagah biphar rahī hai

hairāñ hai aañkh chashm-e-ināyat ko kyā huā
duniyā meñ rasm-o-rāh-e-mohabbat ko kyā huā

maanā ki shahr-e-husn meñ jins-e-vafā nahīñ
lekin jahāñ meñ ishq kī daulat ko kyā huā

aatī hai yaad roz ḳhud aatī nahīñ magar
yārab hamārī shām-e-masarrat ko kyā huā

vaqt-e-vidā.a zard huā rañg-e-ruḳh agar
rañg-o-bahār-e-āriz-e-fitrat ko kyā huā

thī ham ko aql se to na pahle hī kuchh umiid
'nayyar' junūñ ke faiz-o-karāmāt ko kyā huā

chalī bād-e-jabr agar to kyā mujhe yuuñ jahāñ na bujhā sakā
mujhe raas aa.ī yahī huā mirā sho.ale aur bhaḌak ga.e

aql-e-sabr-āshnā se kuchh na huā
shauq kī be-qarāriyāñ na ga.iiñ

mujhe apne zabt pe naaz thā sar-e-bazm raat ye kyā huā
mirī aañkh kaise chhalak ga.ī mujhe rañj hai ye burā huā

mirī zindagī ke charāġh kā ye mizāj koī nayā nahīñ
abhī raushnī abhī tīrgī na jalā huā na bujhā huā

mujhe jo bhī dushman-e-jāñ milā vahī puḳhta-kār-e-jafā milā
na kisī kī zarb ġhalat paḌī na kisī kā tiir ḳhatā huā

mujhe aap kyuuñ na samajh sake ye ḳhud apne dil hī se pūchhiye
mirī dāstān-e-hayāt kā to varaq varaq hai khulā huā

jo nazar bachā ke guzar ga.e mire sāmne se abhī abhī
ye mire hī shahr ke log the mire ghar se ghar hai milā huā

hameñ is kā koī bhī haq nahīñ ki sharīk-e-bazm-e-ḳhulūs hoñ
na hamāre paas naqāb hai na kuchh āstīñ meñ chhupā huā

mujhe ik galī meñ paḌā huā kisī bad-nasīb kā ḳhat milā
kahīñ ḳhūn-e-dil se likhā huā kahīñ āñsuoñ se miTā huā