Tags-Hawa

haq fat.h-yāb mere ḳhudā kyuuñ nahīñ huā
tū ne kahā thā terā kahā kyuuñ nahīñ huā

jab hashr isī zamīñ pe uThā.e ga.e to phir
barpā yahīñ pe roz-e-jazā kyuuñ nahīñ huā

vo sham.a bujh ga.ī thī to kohrām thā tamām
dil bujh ga.e to shor-e-azā kyuuñ nahīñ huā

vāmāñdgāñ pe tañg huī kyuuñ tirī zamīñ
darvāza āsmān kā vā kyuuñ nahīñ huā

vo sho.ala-sāz bhī isī bastī ke log the
un kī galī meñ raqs-e-havā kyuuñ nahīñ huā

āḳhir isī ḳharābe meñ zinda haiñ aur sab
yuuñ ḳhaak koī mere sivā kyuuñ nahīñ huā

kyā jazb-e-ishq mujh se ziyāda thā ġhair meñ
us kā habīb us se judā kyuuñ nahīñ huā

jab vo bhī the gulū-e-burīda se nāla-zan
phir kushtagāñ kā harf rasā kyuuñ nahīñ huā

kartā rahā maiñ tere liye dostoñ se jañg
tū mere dushmanoñ se ḳhafā kyuuñ nahīñ huā

jo kuchh huā vo kaise huā jāntā huuñ maiñ
jo kuchh nahīñ huā vo batā kyuuñ nahīñ huā

ab to is kī zad meñ hai saarā nagar aayā huā
vo bhī din the sail thā jab sāhiloñ ke darmiyāñ

ham ne kahne ko tumheñ dil se bhulāyā huā hai
bas yahī daaġh hai siine meñ chhupāyā huā hai

ab giregī bhī to kaise ki bahut sabr ke saath
ham ne dīvār ko hāthoñ se banāyā huā hai

baat karne ko bahut der se sochā us se
jis kī tahrīr ko āñkhoñ meñ basāyā huā hai

chashm-e-be-aib meñ us kā hī sarāpā kyuuñ thā
jis kā ġham hadd-e-tamannā meñ samāyā huā hai

ḳhvāhish-e-qurb ke paivand haiñ hāthoñ meñ mire
ai junūñ-zād mujhe kitnā satāyā huā hai

koī kahtā hai rifāqat nahīñ milne vaalī
koī kahtā hai vo dahlīz pe aayā huā hai

vasl kī shaam kā andāza bahut mushkil thā
ham ne pūchhā thā magar us ne chhupāyā huā hai

ek huā dīvāna ik ne sar teshe se phoḌ liyā
kaise kaise log the jin se rasm-e-vafā kī baat chalī

koī mauj-e-bahr se duur hai to jabīn-e-bahr pe kyā shikan
tirī rahmatoñ ko huā ye kyā mirī laġhzishoñ pe nazar paḌī