Tags-Hawa

bigḌī hai aisī shakl havādis kī maar se
hairān aa.ina bhī mujhe dekh kar huā

ik baar hī to kāñdhe pe rakkhā thā us ne sar
phir aisā ittifāq kahāñ umr bhar huā

jis kī nazar meñ vus.at-e-ḳhvāb-o-ḳhayāl thī
us kā vajūd markaz-e-ahl-e-nazar huā

pahle to ik makān kī sūrat hī thā faqat
tashrīf aap laa.e to ghar merā ghar huā

us ko hamārī dasht-navardī se hai ḳhushī
is se ġharaz nahīñ ki koī dar-ba-dar huā

sab kī samajh meñ aatā kahāñ hai ye ilm-o-fan
jis ne samajh liyā use vo dīda-var huā

'rahbar' tavīl umr bhī jiine se faiz kyā
kuchh maqsad-e-hayāt na puurā agar huā

jab nāḳhun-e-hikmat hī TuuTe dushvār ko āsāñ kaun kare
jab ḳhushk huā abr-e-bārāñ hī shāḳhoñ ko gul-afshāñ kaun kare

kyā huā jo hisāb māñgā hai
kyā ġhamoñ kī koī dukāñ huuñ maiñ

jab bhī gulshan meñ chalī ThanDī havā
aur pāgal kar ga.ī ThanDī havā

pahle to aisī na thī ThanDī havā
ho ga.ī kyuuñ dil-jalī ThanDī havā

sun ke us kī baat ġhunche hañs paḌe
kaan meñ kyā kah ga.ī ThanDī havā

un ke hoñToñ kā jo kar aa.ī tavāf
pā ga.ī kuchh naġhmagī ThanDī havā

hai dil-e-nākām se achchhī nahīñ
chheḌ-ḳhāni bhī tirī ThanDī havā

sach batā merī tarah kyā un kī bhī
be-qarārī thī baḌhī ThanDī havā

zaḳhm-e-dil jis se huā kuchh mundamil
kūcha-e-jānāñ kī thī ThanDī havā

dekh lete ham bhī terā kuchh kamāl
khiltī gar dil kī kalī ThanDī havā

ik pareshāñ dil kā kah degī salām
milnā un se gar kabhī ThanDī havā

'tarzī' aisā hai asīr-e-ġham tirā
haal par jis ke hañsī ThanDī havā

sharminda huā thā yahīñ pindār-e-imārat
chamkā thā faqīroñ kā muqaddar isī ghar meñ