Tags-Hawa

majnūñ to phirā jañgal jañgal farhād ne chīrā koh-e-dilā
maiñ aah rahā be-dast-o-pā ye bhī na huā vo bhī na huā

din ko bhī na dekhā ham ne use shab ḳhvāb meñ bhī yaaro na milā
is tāla-e-ḳhufta kā hove burā ye bhī na huā vo bhī na huā

nazdīk 'nasīr' apne āsāñ farmā.ish thī goyā ye ġhazal
kuchh us kā bhī kahnā mushkil thā ye bhī na huā vo bhī na huā

kyā huā lafz lafz jiine se
ik ibārat meñ jab raqam na hue

hai mausam-e-bahār kā āġhāz qahr hai
ab bhī agar chaman meñ havā mo'tadil na ho

najāt-e-rūh bhī arzāñ nushūr-e-dil kī tarah
huā hai sahl zamīroñ ke daaġh dhonā bhī

muskurātī huī in āñkhoñ kī shādābī meñ
maiñ tirī ruuh kā taptā huā sahrā dekhūñ

ham sar-kashī se muddatoñ masjid se bach bach kar chale
ab sajde hī meñ guzre hai qad jo huā mehrāb sā

soch meñ Duubā huā huuñ aks apnā dekh kar
jī laraz uTThā tirī āñkhoñ meñ sahrā dekh kar

havā daraḳhtoñ se jab gale mil ke ro rahī ho
parind lambe safar pe jaa.eñ to lauT aanā

is shahr meñ kyā chāñd chamaktā huā dekheñ
is shahr meñ har shakl to gahnā.ī huī hai

havas kā rañg chaḌhā us pe aur utar bhī gayā
vo ḳhud hī jam.a huā aur ḳhud bikhar bhī gayā

dīda-e-ḳhūñ-nāba-afshāñ merā un ke sāmne
be-ḳhudī ke haath se chhūTā huā ik jaam thā

qabā-e-jism ki hai taar taar nazr kareñ
kabhī kahīñ vahī pāgal havā mile to sahī

har chehra na jaane kyuuñ ghabrāyā huā sā hai
bechain sā lagtā hai taḌpāyā huā sā hai

kyā dhoka nayā koī khāyā hai mohabbat meñ
har uzv-e-badan us kā tharrāyā huā sā hai

ā.ankhoñ meñ chamak sī hai ruḳhsār meñ surḳhī sī
āġhosh meñ ulfat kī sharmāyā huā sā hai

khilne kī tamannā thī zulfoñ ke gulistāñ meñ
dil TuuT gayā gul kā murjhāyā huā sā hai

khulne meñ qabāhat hai gesū-e-mohabbat ko
chehra shab-e-hasrat kā pathrāyā huā sā hai

alfāz kī ā.ankhoñ se barsāt hai ashkoñ kī
lahja ġham-e-jānāñ se bharrāyā huā sā hai