ḳhatm un ke kabhī sitam na hue
sar hamāre agarche ḳham na hue
tum koī shaam aisī batlāo
jab hue tum udaas ham na hue
apnā ḳhāliq to hai sanam apnā
ham kisī ke magar sanam na hue
kis ko āñkheñ milā ke dekheñ jab
terī nazroñ meñ mohtaram na hue
aur jiine kā kyā hunar rakhte
kam se kam haath to qalam na hue
kyā huā lafz lafz jiine se
ik ibārat meñ jab raqam na hue
lutf 'bebāk' us safar meñ kahāñ
jis kī rāhoñ meñ zer-o-bam na hue