Tags-Gham

aise bhī kuchh ġham hote haiñ
jo ummīd se kam hote haiñ

kyā kuchh na huā ġham se kyā kuchh na kiyā ġham ne
aur yuuñ to huā jo kuchh be-kār nazar aayā

ai ishq qasam tujh ko ma.amūra-e-ālam kī
koī ġham-e-furqat meñ ġham-ḳhvār nazar aayā

shab kaT ga.ī furqat kī dekhā na 'firāq' āḳhir
tūl-e-ġham-e-hijrāñ bhī be-kār nazar aayā

uThātī haiñ girātī haiñ yahī dīvār apnoñ maiñ
ḳhushī chhūkar hañsī to ġham chhupātī uñgliyāñ dekho

dil hai ki ġham-e-dil kā azā-dār nahīñ hai
jaañ hai ki sam-e-zīst se bezār nahīñ hai

kidhar ga.ī shab-e-dil kī niDhāl sī bastī
kahāñ gayā ġham-e-rafta savāl thā us kā

ātish-e-ġham se mirī jaan guzarnā hai abhī
TuuT kar mujh ko ka.ī baar bikharnā hai abhī

ab intizār ke mausam udaas karte nahīñ
ajiib hai ki hameñ ġham udaas karte nahīñ

ġham zāt-o-ḳhair-o-jamāl ke
vahī pher ahl-e-savāl ke

baham ik muḳhtasar se dil meñ haiñ shādī o ġham donoñ
ye chhoTā sā makāñ aur is meñ dozaḳh bhī hai jannat bhī

ai ġham-e-māzī tujhe maiñ nazr kyā duuñ
ḳhushk āñkhoñ ke kaTore ho ga.e haiñ

dil ke zaḳhmoñ kī ḳhabar hone na dī ashkoñ ko
ġham kā āñkhoñ se sarokār nahīñ hone diyā

maiñ vo ġham-ḳhvār huuñ ġham aañkh kī putlī kā tirī
dāna-e-ḳhāl nahīñ hai ki jo khā hī na sakūñ

ġham bhalā kaise khule us pe hamāre vaalā
ham to haiñ beach bhañvar ke vo kināre vaalā

ābād ġham-o-dard se vīrāna hai us kā
TuuTā huā jo dil hai vo kāshāna hai us kā

nahīñ tere liye ye do minute kī chup nahīñ kaafī
tirā ġham mustahiq hai umr bhī kī nauha-ḳhvānī kā

kabhī kabhī tirī nazar kā aasrā bhī mil gayā
simaT ke rah ga.iiñ haiñ ġham kī vus.ateñ kabhī kabhī

ye armān jab tak machalte raheñge
hazāroñ hī ġham dil meñ palte raheñge

nasīboñ se milte haiñ ġham ye samajh kar
faqat ḳhud ko ḳhud se hī chhalte raheñge