Tags-Gham

bikhar chukā huuñ ġham-e-zindagī ke shānoñ par
ab apnī zulf kī sūrat sañvār de mujh ko

gard hai ruḳhsār par zulfeñ aTī haiñ ḳhaak meñ
nāzukī bal khā rahī hai dīda-e-ġhamnāk meñ

ġham ke bādal ḳhātir-e-nāzuk pe haiñ chhā.e hue
āriz-e-rañgīñ haiñ yā do phuul murjhā.e hue

isī ke saath chaltī hai ye manzil par pahuñchne tak
ye rāh-e-ġham jise apnā musāfir jaan letī hai

zahrāb-e-zamāna pī pī kar jo ahl-e-junūñ the raah lage
shā.er ko 'nushūr' ik zulf-e-dotā ġham de na sakī uljhā hī ga.ī

vāsta jis kā tire ġham se na ho
ham vo har kaam uThā rakhte haiñ

jaane kyā ġham nihāñ the ḳhushiyoñ meñ
thoḌā thoḌā ġharīb sā din thā

akele ġham se na.ī shā.irī nahīñ hotī
zabān-e-'mīr' meñ 'ġhālib' kā imtizāj bhī ho

ġham sahte sahte muddat tak aisī bhī hālat hotī hai
āñkhoñ meñ ashk umaDte haiñ rone se nafrat hotī hai

vo vahshat ke jañgal meñ ho kar pareshāñ pahāḌoñ se ġham ke na ho sañg hargiz
sharar ho ke chhiḌ sañg tinke suuñ jaldī sakal ruuh ho barq rañgoñ meñ rahiye

yuuñ ḳhushī kī havas na jā.egī
ek ik ġham ko be-naqāb karo

ho hī gayā hai nabz-shanās-e-ġham-e-jahāñ
siine meñ ishq ke mirā dil kāñptā huā

jahāñ meñ juz ġham-o-ranj-o-musībat
milā bhī hai azīzo kuchh kisī ko

azmat-e-ahl-e-vafā aur baḌhā detā hai
ġham-e-musalsal ho to phir ġham bhī mazā detā hai

ġham kī taufīq bhī sab ko nahīñ miltī 'gauhar'
ye vo ne.amat hai jo mushkil se ḳhudā detā hai

lagā kar zaḳhm par pahre sulā ke dil ke saare ġham
maiñ jab bhī hañsnā chāhūñ to udāsī chīḳh paḌtī hai

ta.aziyat kī khokhlī hai rasm jaarī āj-kal
is tarah se ho rahī hai ġham-gusārī āj-kal

ġham-e-zamāna tirī zulmateñ hī kyā kam thiiñ
ki baḌh chale haiñ ab un gesuoñ ke bhī saa.e

rahm un ko hāl-e-ġham par aa gayā
dil kare be-dast-o-pā.ī par ghamanD

nigāh o dil ko qarār kaisā nashāt o ġham meñ kamī kahāñ kī
vo jab mile haiñ to un se har baar kī hai ulfat na.e sire se