Tags-Dil

poñchhtā koī nahīñ ab mujh se merā hāl-e-dil
shāyad apnā hāl-e-dil ab mujh ko kahnā aa gayā

lab pe naġhma aur ruḳh par ik tabassum kī naqāb
apne dil kā dard ab 'mullā' ko kahnā aa gayā

mohabbat meñ mire betāb dil kī dhaḌkaneñ hamdam
tirī āġhosh meñ aa kar jo thak jaa.eñ to achchhā hai

numāyāñ hoñ na āñkhoñ se kahīñ ismat mohabbat kī
ye sho.ale dil ke dil hī meñ dahak jaa.eñ to achchhā hai

ishq mahv-e-ġham-e-zindagī ho gayā husn madhosh-e-ishva-tarāzī rahā
ahl-e-dil hosh meñ aa chuke haiñ magar hai vahī ālam-e-dil-barāñ aaj tak

mushkileñ āfateñ hādse sānehe aa.e 'aḳhtar' mirī raah meñ kis qadar
mujh ko aage baḌhātā rahā hai magar merā dil merā azm-e-javāñ aaj tak

hameñ kuchh aur jiinā hai to dil ko shaad rakkheñge
bahut kuchh bhuul jā.eñge bahut kuchh yaad rakkheñge

ḳhushbū kī tarah guuñj uThā harf-e-āgahī
ai dil zarā hisār-e-nafas kā zavāl dekh

ye dil un se jab se lagā hai
un ke sivā sab bhuul gayā hai

ḳhud pe sau jabr kiye dil ko bahut samjhāyā
raas aa.ī kahāñ duniyā hameñ āsānī se

Dare kyuuñ sher-dil-āshiq raqībāñ ke bidakne suuñ
koī bāvar nahīñ kartā shujā.at in chakāroñ meñ

na kah sīmāb ke mānind mere dil kuuñ ai chanchal
tirā betāb hai mumtāz saare be-qarāroñ meñ

nikalnā māh-rū ke daam se dushvār hai yārāñ
rahā hai 'mubtalā' kā dil ulajh zulfāñ ke tāroñ meñ

rahā hogā vo kitnā dil ġhanī dast-e-saḳhī jis ne
junūñ kī mumlikat kā ek patthar daam rakkhā hai

ġham kī maujoñ meñ dil kī
naav bahtī jaatī hai

toḌ ga.e jo ka.aba-e-dil
bande ḳhaas ḳhudā ke the

rah ga.ī vo nigāh-e-nāz qalb o jigar meñ baiTh kar
dil meñ latīf sī ḳhalish aañkh hai āñ.suoñ se tar

raat kī niiñd uḌ ga.ī din kā sukūn luT gayā
terī nigāh-e-nāz ne kar diyā dil pe kyā asar

shāḳh se gul jo gir paḌā dil se lagā ke rakh liyā
daur-e-ḳhizāñ bhī dekh luuñ phuul chune haiñ umr bhar

rañg-e-chaman ko dekh kar 'ārif'-e-ḳhasta-dil ye kyā
phūloñ pe hai kabhī nazar kāñToñ pe hai kabhī nazar