Tags-Dil

niiñd kā panchhī aa pahuñchā hai vahshī dil kī baat na sun
mil bhī ga.e to āḳhir thak kar gahrī niiñd hī sonā hai

lafzoñ kā bayāñ dilkash dilkash duniyā-e-amal suunī suunī
schemeñ haiñ gaTThar kā gaTThar ma.alūm nahīñ kyā honā hai

nāzuk nāzuk jazbe dil ke
halkī halkī ThanDī aaheñ

shīsha-e-dil ke har TukḌe meñ
ek ik sūrat kis ko chāheñ

dukhte hue dil kī rag rag meñ
tum chuTkī lo ham na karāheñ

kyā na guzartī hogī dil par
ro na sakeñ jab ronā chāheñ

maiñ tazkira karūñ to kyā karūñ jamāl-e-yār kā
damak rahī thī dilkashī charāg ke baġhair bhī

dil hai vīrān bayābāñ kī tarah
gosha-e-shahr-e-ḳhamoshāñ kī tarah

us ko to pachhtānā hai
jis ne dil kī maanī hai

maiñ bhī man kā raajā huuñ
vo bhī dil kī raanī hai

ai dil us ko bhuul bhī jā
ye kaisī man-mānī hai

shāyad tumhārī yaad mire paas aa ga.ī
yā hai mire hī dil kī sadā sochnā paḌā

sirf zabāñ kī naqqālī se baat na ban pā.egī 'hafīz'
dil par kaarī choT lage to 'mīr' kā lahja aa.e hai

mauj-e-ġham se hī dil bahaltā hai
ye charāġh āñdhiyoñ meñ jaltā hai

maiñ karūñ kyuuñ na us kī qadr 'anvar'
dil ke sāñche meñ ashk Dhaltā hai

dil pareshāñ ho magar aañkh meñ hairānī na ho
ḳhvāb dekho ki haqīqat se pashīmānī na ho

jab tum saf-e-adū meñ chale jāoge to phir
dil meñ malāl-e-kor-nigāhī na lā.ūñgā

dilkash hai gulsitāñ bhī tire husn kī tarah
lekin tirī adā kī tarah dil-sitāñ nahīñ

yād-e-yārāñ dil meñ aa.ī huuk ban kar rah ga.ī
jaise ik zaḳhmī parinda jis ke par TuuTe hue

vo jo dil kī mamlikat thī bābarī masjid huī
bastiyāñ sunsān ghar vīrān dar TuuTe hue