Tags-Dil

mire liye to ye bekār hone vaalā hai
ye dil ki dard se bezār hone vaalā hai

rahā karte haiñ vo dil meñ phirā karte haiñ nazroñ meñ
atā karte haiñ nuur āñkhoñ ko dil raushan banāte haiñ

salāh-e-ishq de de kar kiye dete haiñ ḳhud rafta
tire shaidā.ī dil se dost ko dushman banāte haiñ

aa ga.ī āḳhir ġham-e-dil vo bhī manzil aa ga.ī
mujh ko samjhāte the jo ab un ko samjhātā huuñ maiñ

zehn meñ yādoñ ke gulshan dil meñ azm-e-jū-e-shīr
ik nayā farhād paatā huuñ jidhar jaatā huuñ maiñ

shab ke sannāTe meñ rah ġhairoñ ke naġhme kī tarah
ahl-e-dil kī bastiyoñ meñ aah ban jaatā huuñ maiñ

vo hai be-nazar 'pāshī' us ko kyā ḳhabar 'pāshī'
kitne dil sulagte haiñ ik diyā bujhāne se

vahshat karne se bhī dil bezār huā hai
dasht o samundar āñchal meñ simTā.e hue huuñ

jin bātoñ ko sunñā tak bār-e-ḳhātir thā
aaj unhīñ bātoñ se dil bahlā.e hue huuñ

jaate haiñ dil meñ chhoḌ ke vo jalva-e-ḳhayāl
bujhtī hai sham.a ghar meñ añdherā kiye baġhair

aksar to dil giraftagī-e-shauq kī qasam
mujh tak vo aa ga.e haiñ irāda kiye baġhair

tujh se mil kar bhī udāsī nahīñ jaatī dil kī
tū nahīñ aur koī merī kamī ho jaise

maiñ vo ma.anī-e-ġham-e-ishq huuñ jise harf harf likhā gayā
kabhī āñsuoñ kī bayāz meñ kabhī dil se le ke kitāb tak

rah gayā ḳhvāb-e-dil-ārām adhūrā kis kā
Dhal ga.ī shab to khulā hai ye darīcha kis kā

ḳhayāl achchhā huā to sher ban kar aa.egā bāhar
bahut achchhā huā to dil ke andar baiTh jā.egā

jale hai dekh ke bālīn-e-yār par mujh ko
na kyuuñ ho dil pe mire dāġh-e-bad-gumānī-e-sham.a

ḳhūn-e-junūñ to jal gayā shauq kidhar nikal gayā
sust haiñ dil kī dhaḌkaneñ tez hai nabz-e-ārzū

phir tirī yaad se raushan huā kāshana-e-dil
vus.at-e-kaun-o-makāñ jalva-gah-e-nāz na ho

dard kī dhūp-bhare dil kī tamāzat le kar
kaise jaa.e koī ehsās kī hijrat le kar

phir kahāñ jā.iye ab baiThiye mātam kiije
dil ke hāthoñ meñ ye anmol sharāfat le kar