Tags-Dil

silsila chhiḌ gayā phir dil kī giraftārī kā
phir nasīm aaj hilāne lagī zanjīr-e-bahār

ġham ke rishtoñ ko kabhī toḌ na denā 'vālī'
ġham ḳhayāl-e-dil-e-nā-shād bahut kartā hai

maiñ is dil ko jalānā chāhtā huuñ
mujhe is dil ne taḌpāyā bahut hai

dil vo panchhī hai kabhī daam meñ aatā hī nahīñ
chuuk jaate haiñ nigāhoñ ke nishāne kitne

aañkh se aañkh jab nahīñ miltī
dil se dil ham-kalām hotā hai

aur murjhā.egī terī chheḌ se dil kī kalī
kar na dūbhar mujh pe ai bād-e-bahārī zindagī

kyā lutf de gayā vo fareb-e-vafā kā daur
goyā kisī ke dil pe hameñ e'tibār thā

ik āh-e-garm ham ne bharī thī shab-e-firāq
jal kar sahar ko ḳhaak dil-e-be-qarār thā

ik laḳht-e-dil bachā thā magar vo bhī ai 'nazar'
āḳhir ko nazr-e-dīda-e-ḳhūñ-nāba-yār thā

na jaane kab tire dil par na.ī sī dastak ho
makān ḳhālī huā hai to koī aa.egā

dil meñ aur āñkhoñ meñ tujh se chhūT jaane kā malāl
tazkira hoñToñ pe lekin dūsre hālāt kā

ham un ke zor ke qaa.il haiñ haiñ vahī shah-zor
jo ishq meñ dil-e-muztar ko thaam lete haiñ

kūcha-e-zulf meñ gayā jab dil
barg-e-sumbul kuuñ zād-e-rāh kiyā

kyā kahūñ tum ko ai dil o diida
jo jo kuchh sar pe mere laa.e ho

sāmne un ko paayā to ham kho ga.e aaj phir hasrat-e-guftugū rah ga.ī
un se kahnā thā rūdād-e-shām-e-alam dil kī dil hī meñ ye aarzū rah ga.ī

ġham ke sāñche meñ ik ik nafas Dhal gayā un kī mahfil meñ ye daur bhī chal gayā
ashk piine se maanā ki dil jal gayā zabt-e-ġham kī magar aabrū rah ga.ī

dil meñ dāġhoñ kā jab se hai ik gulistāñ chhin ga.ī haiñ bahāroñ se rañgīniyāñ
ab guloñ meñ vo pahlī sī nik.hat kahāñ aarzī raunaq-e-rañg-o-bū rah ga.ī

aañkh se aañkh aur dil se dil jab milā jaane un kī nigāhoñ ne kyā kar diyā
merī āñkhoñ meñ us roz se ai 'sabā' khiñch ke tasvīr-e-jām-o-subū rah ga.ī

dil kī talab paḌī hai to aayā hai yaad ab
vo to chalā gayā thā kisī dilrubā ke saath

paḌhtā namāz maiñ bhī huuñ par ittifāq se
uThtā huuñ nisf raat ko dil kī sadā ke saath