Tags-Dil

tire dil kī bhī na kalī khile tire haath TūTeñ ḳhudā kare
jise toḌe letā hai bāġhbāñ yahī phuul jān-e-bahār hai

mujhe mushkil meñ yuuñ andāza-e-mushkil nahīñ hotā
kabhī maiñ kasrat-e-afkār se bad-dil nahīñ hotā

dil-e-nākām phir le kaam zauq-e-sa.ī-e-paiham se
kaf-e-afsos malne se to kuchh hāsil nahīñ hotā

chashm-e-mushtāq tamāshā-e-karam chāhe hai
dil vo barbād-e-karam hai ki sitam chāhe hai

dil kā har zaḳhm mirā dād-e-vafā māñge hai
be-gunāhī mirī ab tum se sazā māñge hai

dil-e-kam-baḳht ko dekho to ye kyā māñge hai
ek but sab se alag sab se judā māñge hai

ik uchaTtī sī nazar ek tabassum kī kiran
dil-e-kam-zarf vafāoñ kā silā māñge hai

hamāre paas hai hikmat na raaz kyā kiije
sivā.e dard-e-dil-e-jāñ-gudāz kyā kiije

na zarb-o-tār se rishta na dil-fareb-e-dam
mire ḳhayāl ko aalam hai saaz kyā kiije

bas dil kā ġhubār dho chuke ham
ronā thā jo kuchh so ro chuke ham

milī mohlat to dil meñ jhāñk lūñgā
abhī to zehn par merī nazar hai

dukh to yahī hai in bātoñ se tum kitne anjān rahe
dil meñ basā kar tum ko ham ne dekhā kaisā kaisā ḳhvāb

rauzan khulā thā dil kā havā.eñ bhī aa.ī thiiñ
lekin qarīb-tar thā jo dilbar kahāñ gayā

na jaane kab vo palaT aa.eñ dar khulā rakhnā
ga.e hue ke liye dil meñ kuchh jagah rakhnā

hamāre dil meñ jo vahshat ne aag bhaḌkā.ī
sharar bhī rah ga.e pīchhe ye garm jast hue

rahā ḳhumār ki sadme se chuur shīsha-e-dil
magar na sā.il-e-mai tere mai-parast hue

habāb se bhī habīboñ ke dil meñ nāzuk-tar
nazar ke bhī jo lage Thes ye shikast hue

taḌap dikhā na ise 'bahr' māhī-e-dil kī
ġhazab huā jo vo tār-e-nigāh shast hue

kabhī kabhī jo parinde bhī an-sunā kar deñ
to haal dil kā shajar ko sunāyā jaatā hai

yārāñ vo jo hai merā masīhā-e-jān-o-dil
be-had aziiz hai mujhe achchhā kiye baġhair