Tags-Dil

siina apnā hai hamārā dil-e-sozāñ apnā
sham-e-fānūs o charāġh-e-tah-e-dāman kaisā

mohabbat meñ tapāke-zāhirī se kuchh nahīñ hotā
jahāñ dil ko lagī ho dil-lagī se kuchh nahīñ hotā

dil to apne aap meñ gum hai
ab kis ko taḌpātā hai tū

ik din kī baat ho to use bhuul jaa.eñ ham
nāzil hoñ dil pe roz balā.eñ to kyā kareñ

unheñ apne dil kī ḳhabreñ mire dil se mil rahī haiñ
maiñ jo un se ruuTh jā.ūñ to payām tak na pahuñche

ham se bin marg kyā judā ho malāl
jaan ke saath hai dil-e-nāshād

lagtī hai kuchh sumūm sī to nasīm
ḳhaak kis diljale kī barbād

par muravvat kahāñ kī hai ai 'mīr'
tū hī mujh diljale ko kar irshād

māthe par Tiikā sandal kā ab dil ke kāran rahtā hai
mandir meñ masjid bantī hai masjid meñ barhaman rahtā hai

dil toḌ ke jaane vaale sun do aur bhī rishte baaqī haiñ
ik saañs kī Dorī aTkī hai ik prem kā bandhan rahtā hai

aisā vīrāñ huā hai dil is baar
ab ke imkāñ nahīñ haiñ basne ke

chashm-e-tar ko zabān kar baiThe
haal dil kā bayān kar baiThe

ik zamāne ko rakhā tere ta.alluq se aziiz
silsila dil kā bahut duur talak jaatā hai

ka.ī dishāoñ se guzrā hai kārvān-e-hayāt
Thahar ke dil ko kahīñ mubtalā kiyā hī nahīñ

maiñ sham-e-shab-zulm huuñ āġhāz-e-sahar tak
dil bujhne lagā sub.h kī tanvīr dikhā kar

dil ko tum shauq se le jaao magar yaad rahe
ye na merā na tumhārā na kisī kā hogā

chhup ke duniyā se savād-e-dil-e-ḳhāmosh meñ aa
aa yahāñ tū mirī tarsī huī āġhosh meñ aa

aur duniyā meñ kahīñ terā Thikāna hī nahīñ
ai mire dil kī tamannā lab-e-ḳhāmosh meñ aa

jazb-e-vahshat kī kārsāzī se
dil kī qismat sañvar ga.ī āḳhir

jo qayāmat guzarnī thī ham par
dil ke hāthoñ guzar ga.ī āḳhir