Tags-Dil

'haqīr' is dil ke hāthoñ maiñ ne ab ke
uThā.ī aisī bīmārī ki tauba

hamārī ma.asūmiyat to dekho rakh aa.e dil ham huzūr-e-jānāñ
ki jaise koī ḳhudā kā banda havā ke aage charāġh rakh de

maiñ dil kī bātoñ meñ aa gayā aur uThā ke le aayā us kī paa.el
dimāġh detā rahā sadā.eñ charāġh rakh de charāġh rakh de

terī yādoñ ke diye kartā huuñ raushan shab ko
tab kahīñ jā ke dil-e-zār sukūñ paatā hai

dair ye hai vo haram hai vo sanam-ḳhāna hai
dekhnā hai dil-e-dīvāna kidhar jaatā hai

tum nahīñ hote to dil rūThā huā rahtā hai
tum jo aate ho to dīvāna bahal jaatā hai

aah us vaqfa-e-fursat pe dil-o-jān nisār
aap kā dhyān jab aatā hī chalā jaatā hai

jhiḌak diyā hameñ kūche meñ us ne har-dam dekh
ham apne dil meñ kuchh us dam ḳhajil kasīr hue

ham dikhā.eñge tamāsha tujh ko phir sarv-e-chaman
dil se gar sarzad hamāre nāla-e-mauzūñ huā

qaa.em rahī junūñ meñ bhī ik vaz-e-ehtiyāt
dil ḳhuun ho gayā hai magar aañkh nam nahīñ

dil hai jamāl-e-yār kī lazzat se faizyāb
is aa.ine meñ koī bhī tasvīr-e-ġham nahīñ

kuchh to insāf bhalā kījiye dil meñ apne
tum ne maanī bhī kabhī merī ajī baat koī

hoñ jo saare dast o pā haiñ ḳhuuñ maiñ nahlā.e hue
ham bhī haiñ ai dil bahārāñ kī qasam khaa.e hue

saaz uThāyā jab to garmāte phire zarroñ ke dil
jaam haath aayā to mahr o mah ke ham-sā.e hue

gumān-o-vaham ke be-nām jhuTpuToñ se nikal
zabāñ na khol magar dil kī dhaḌkanoñ se na ruuTh

javāñ rutoñ ko gale se lagā ke jī 'irfān'
dil-o-nazar ke ziyā-bār mausamoñ se na ruuTh

dil ke hāthoñ 'haqīr' jhagḌoñ meñ
merī guzrī sadā javānī hech

vāsta koī na rakh kar bhī sitam Dhāte ho tum
dil taḌap uThtā hai ab kaahe ko yaad aate ho tum

dil-guzārī bhī liye hai imtiyāz-e-husn-o-ishq
ḳhuun ro detā huuñ maiñ aur ashk pī jaate ho tum

chāñd meñ rañgat tumhārī phuul bhī tum se base
khīñchtī haiñ dil fazā.eñ yaad aa jaate ho tum