Tags-Dil

dil meñ maqtūl kī tasvīr liye phirtā huuñ
aur qātil se aqīdat kā bhī iz.hār karūñ

jhāñktā kaun hai ab dil ke shagāfoñ meñ 'rashīd'
zaḳhm chehre pe sajāo to koī baat bane

dil kī miTTī chupke chupke rotī hai
yaar kahīñ barsāt ġhamoñ kī hotī hai

dil-e-dīvāna-o-andāz bebākāna rakhte haiñ
gadā-e-mai-kada haiñ vaz.a āzādāna rakhte haiñ

ba-zāhir ham haiñ bulbul kī tarah mash.hūr harjā.ī
magar dil meñ gudāz-e-fitrat-e-parvāna rakhte haiñ

zaḳhm mere dil pe ik aisā lagā
apnī jaañ kā ruuh ko dhaḌkā lagā

raushnī dil kī achānak gul huī
ḳhud ko thoḌī der meñ andhā lagā

harf-e-inkār sar-e-bazm kahā maiñ ne 'zafar'
laakh andeshe mire dil ko Darāne nikle

tū samajhtā hai mujhe harf-e-mukarrar lekin
maiñ sahīfa huuñ tire dil pe utarne vaalā

kis harf pe tū ne gosha-e-lab ai jān-e-jahāñ ġhammāz kiyā
elān-e-junūñ dil vāloñ ne ab ke ba-hazār-andāz kiyā

sau paikāñ the paivast-e-gulū jab chheḌī shauq kī lai ham ne
so tiir tarāzū the dil meñ jab ham ne raqs āġhāz kiyā

chalo ho rāh-e-muāfiq kahe muḳhālif ke
tarīq chhoḌ diyā tum ne dil-navāzī kā

basān-e-ḳhāk ho pāmāl rāh-e-ḳhalq ai 'mīr'
rakhe hai dil meñ agar qasd sarfarāzī kā

badal jaate haiñ dil hālāt jab karvaT badalte haiñ
mohabbat ke tasavvur bhī na.e sāñchoñ meñ Dhalte haiñ

tabassum jab kisī kā ruuh meñ tahlīl hotā hai
to dil kī bāñsurī se nit na.e naġhme nikalte haiñ

mohabbat jin ke dil kī dhaḌkanoñ ko tez rakhtī hai
vo aksar vaqt kī raftār se aage bhī chalte haiñ

diloñ ke nāḳhudā uTh kar sambhāleñ kashtiyāñ apnī
bahut se aise tūfāñ 'maz.harī' ke dil meñ palte haiñ

dekh ai kūcha-e-jānāñ kī havā
dil ke darvāze ka.ī baar khule

zaḳhm-e-dil ham ne chhupā.e varna
terī āñkhoñ ne kiye vaar khule

kyā isī tarah guzar jā.egī
kuchh to un par bhī dil-e-zār khule