Tags-Dil

ḳhamoshī se musībat aur bhī sañgīn hotī hai
taḌap ai dil taḌapne se zarā taskīn hotī hai

ghuTā aatā hai dam ye ishq ne ātish hai sulgā.ī
dil-e-sozāñ se yā qismat dhuāñ āñkhoñ kā duunā hai

kabāb-e-dil agarche soḳhta hai chakh to ai kaifī
ye añgāroñ par āh-e-ātishīñ ne ḳhuub bhūnā hai

tilism ik husn ḳhalq-allah ke aalam kā dil pe hai
phiro irān-o-turkistān faringistāñ-o-yūnā hai

hamāre āh-e-tīr-e-be-kamāñ ne ḳhāna-e-dil se
ye ruḳh pherā ki tā-bām-e-falak bāñdhā sutūnā hai

mirā haal pūchh ke ham-nashīñ mire soz-e-dil ko havā na de
bas yahī duā maiñ karūñ huuñ ab ki ye ġham kisī ko ḳhudā na de

ye jo zaḳhm-e-dil ko pakā.e ham liye phir rahe haiñ chhupā.e ham
koī nā-shanās-e-mizāj-e-ġham kahīñ haath us ko lagā na de

mil gayā dil nikal gayā matlab
aap ko ab kisī se kiyā matlab

husn kā ro.ab zabt kī garmī
dil meñ ghuT ghuT ke rah gayā matlab

muzhda ai dil ki nīm-jāñ huuñ maiñ
ab to puurā huā tirā matlab

kuchh hai matlab to dil se matlab hai
matlab-e-dil se un ko kyā matlab

mustaqil ab bujhā bujhā sā hai
āḳhir is dil ko ye huā kyā hai

ḳhush-adāoñ se bas allāh bachā.e dil ko
ki banā lete haiñ apnā ye parā.e dil ko

ishq āsāñ nahīñ ai jaan baḌā mushkil hai
jaan de de magar insāñ na lagā.e dil ko

ye vo muztar hai ki Thahrā hai na Thahregā kabhī
laakh muTThī meñ koī apne dabā.e dil ko

nigah-e-yār bhī hai taak meñ andāz bhī hai
in luTeroñ se bas allāh bachā.e dil ko

haath us gauhar-e-ḳhūbī ke hai beḌā 'sābir'
bahr-e-ulfat meñ Dubā.e yā tirā.e dil ko

husn ke rāz-e-nihāñ sharh-e-bayāñ tak pahuñche
aañkh se dil meñ ga.e dil se zabāñ tak pahuñche