Tags-Dil

shīsha-e-dil ko agar Thes koī lagtī hai
aañsū be-sāḳhta āñkhoñ se chhalak paḌte haiñ

musalmāñ ke lahū meñ hai salīqa dil-navāzī kā
muravvat husn-e-ālam-gīr hai mardān-e-ġhāzī kā

pise jaate haiñ dil har-gām pe shor-e-qayāmat se
ḳhirām-e-nāz terī fitna-sāmānī nahīñ jaatī

dukhā kar dil mirā phir aap hī uzr-e-jafā karnā
are kāfir tirī ik chaal hai ye laakh chāloñ kī

dil kī ālūdgī-e-zaḳhm baḌhī jaatī hai
saañs letā huuñ to ab ḳhuun kī bū aatī hai

uljhanoñ kā ho asar kyuuñ na sukūn-e-dil par
rabt kyā ham-nafaso sāhil-o-tūfāñ meñ nahīñ

muqaddar ne kahāñ koī nayā paiġhām likkhā hai
azal hī se varaq par dil ke terā naam likkhā hai

ab dil ke dhaḌakne kī sadā bhī nahīñ aatī
aur qarya-e-ḳhvāhish se bhī niklā nahīñ jaatā

hamāre dil meñ hai kyā jhāñk kar na dekh sake
ḳhud apnī zaat se parda uThā ke chhoḌ diyā

maiñ to ho kar aa gayā āzād us kī qaid se
dil magar is jald-bāzī meñ vahīñ par rah gayā

ashk āñkhoñ meñ aur dil meñ aahoñ ke sharar dekhe
barsāt ke mausam meñ jalte hue ghar dekhe

dil ne merī ek sadā par donoñ hāthoñ daan kiyā
jab zambīl mohabbat ne jazbāt se mujh ko ḳhālī dī

aarzū vasl kī rakhtī hai pareshāñ kyā kyā
kyā batā.ūñ ki mere dil meñ hai armāñ kyā kyā

ḳhūn-e-dil piitā hai aur hai jāntā
nemat-e-uzmā use mehmān-e-ishq

daulat hai mere haath meñ dil ko sukūñ nahīñ
chain aur qarār ke liye jāgīr kyā kare

mujh ko vo mere dil ke evaz de sakeñge kyā
'māmūn' duniyā vāloñ se kyā māñgtā huuñ maiñ

kuchh haiñ manzar haal ke kuchh ḳhvāb mustaqbil ke haiñ
ye tamannā aañkh kī hai vo taqāze dil ke haiñ

jo chaltā hai to qadmoñ kī koī aahaT nahīñ hotī
talāsh-e-farq-e-nek-o-bad kī ḳhvāhish ko liye dil meñ

ye kitāb-e-dil kī haiñ āyateñ maiñ batā.ūñ kyā jo haiñ nisbateñ
mire sajda-hā-e-davām ko tire naqsh-hā-e-ḳhirām se

apnī bhī kuchh ḳhabar nahīñ dil kī bhī kuchh ḳhabar nahīñ
ham ne tumhāre hijr meñ kaisā ye haal kar liyā