Tags-Dil

hausle dil ke mohabbat meñ jo piste hī rahe
kar ke himmat tire ġhamzoñ ke muqābil to hue

abas hai duurī kā us ke shikva baġhal meñ apne vo dil-rubā hai
chubhī hai qālib meñ jis tarah jaañ use tarīqe se vo chhupā hai

jahāñ meñ sad.hā hazār-hā ghar base jo the vo ujaḌ ga.e haiñ
na hogā vīrān ḳhāna-e-dil jahāñ vo but aa ke bas gayā hai

log kahte haiñ dil lagānā jise
rog vo bhī lagā ke dekh liyā

hai muhāl un kā daam meñ aanā
dil hai maa.il butāñ kā zar kī taraf

māh-rū ne safar kiyā hai jidhar
dil mirā hai usī nagar kī taraf

dil kī duniyā hai dūsrī duniyā
aise manzar ko bā-vazū dekho

qatra qatra Tapak rahā hai dil
qissa-e-āshiqī sunāne meñ

jise darvāza kahte the vahī dīvār niklī
jise ham dil samajhte the vo duniyā ho rahā hai

tujhe bhī ishq huā hai ye kis zamāne meñ
nahīñ hai māl-e-mohabbat bhī dil-ḳhazāne meñ

hamārā dil hai kisī kaam kā ki nākāra
ye amr aaj ki kal dil-rubā hī tai karegā

imtihān-e-shauq hai aisī āshiqī 'nushūr'
dil kā koī haal ho un ko dilrubā kahūñ

us se kahiyo ki dil kī galiyoñ meñ
raat din terī intizārī hai

ik mahak samt-e-dil se aa.ī thī
maiñ ye samjhā tirī savārī hai

paanī us meñ se bhareñ is meñ gireñ yūsuf-e-dil
chashma-e-chāh-e-zaqan aur kuaañ hai kuchh aur

dil se ik huuk bhī ab uThtī nahīñ
dil ki hañgāma bapā kartā thā

sidq-e-dil señ 'sirāj' bāñdhā hai
ka.aba-e-kū-e-yār kā ehrām

lāyal-pūr ik shahr hai jis meñ dil hai mirā ābād
dhaḌkan dhaḌkan saath rahegī us bastī kī yaad

dil kyā kisī kī baat se andar se kaT gayā
titlī kā rābta kyuuñ gul-e-tar se kaT gayā

mausam ke sard-o-garm kā jal par asar na thā
vo sañg-dil bhī sher-e-suḳhnavar se kaT gayā