Tags-Dil

koī din jaatā hai mahfil meñ bikhar jā.egī
apnī hālat pe pareshāñ dil-e-nākām na ho

bahut hī thoḌī thī dil meñ tumhāre umr mirī
thī ḳhvāb-zād mujhe dāstān honā thā

dil-o-tīr-e-ḳhūñ-chakā kī vo shabīh khīñch detā
jo lahū kā koī qatra sar-e-nok-e-ḳhār hotā

kabhī sochā hai tum ne bhī maiñ chup kyoñ ho ga.ī āḳhir
ki maiñ ne sabr se apnī zabāñ dil meñ dabā lī thī

dil meñ hai kyā jāniye kis kā ḳhayāl-e-naqsh-e-pā
lag ga.iiñ āñkheñ zamīñ se jo misāl-e-naqsh-e-pā

kisī kī yaad ko ham ziist kā hāsil samajhte haiñ
usī ko rāhat-e-jāñ aur sukūn-e-dil samajhte haiñ

dil-e-ġham-dīda rotā hai tirī sahrā-navardī par
magar ai qais ham lailā ko bhī mahmil samajhte haiñ

ab 'sāz' nasheboñ meñ dil ke bas kīchaḌ kaalī daldal hai
yaañ shauq ke Dhalte jharne the yaañ ġham ke ubalte sote the

maiñ sañg-e-dil nahīñ huuñ magar is ke bāvajūd
chaltā hai mujh pe husn kā jaadū kabhī kabhī

aañkh par ḳhuuñ shaq jigar dil dāġhdār
koī nazr-e-yār ke qābil nahīñ

ḳhāmushī merī ye kahtī hai 'jalīl'
dard-e-dil iz.hār ke qābil nahīñ

bejā hai rah-e-ishq meñ ai dil gila-e-pā
ye aur hī manzil hai nahīñ marhala-e-pā

hañgām-e-ḳhirām us ke hujūm-e-dil-e-ushshāq
ġhash-karda haiñ Thokar ke bahar-fāsla-e-pā

dil se rah-e-dil-bastagī kab tai ho 'nazīr' aah
vo zulf-e-musalsal jo na ho silsila-e-pā

sūrat-e-hāl-e-dil badaltā hai
koī rah rah ke haath maltā hai

niiñd TuuTī hai kis kī aahaT se
sat.h-e-dil par koī to chaltā hai

dil agar hai to na ho dard se ḳhālī kisī taur
aañkh agar hai to kisī baat pe bhar bhī aa.e

dil-e-nākām thak ke baiTh gayā
jab nazar aa.ī manzil-e-maqsūd

dil hai vīrāñ to rah nahīñ saktā
dard is meñ base to hoñge hī

ai dil-e-āshufta-sar raat añdherī hai par
raqs tirā sham.a-sāñ ḳhuub hai apnī jagah